Մեզ վրա ամեն ինչ էլ շպրտել են. արդյո՞ք կարգելվի փողոցային երաժիշտների գործունեությունը․ ՏԵՍԱՆՅՈՒԹ

Դհոլահար Հմայակին և ակորդեոնահար Ալեքսանդրին ամեն օր կարող եք տեսնել Հանրապետության հրապարակում։ 6 տարի միասին են նվագում, ասում են՝ ամառ թե ձմեռ՝ կարևոր չէ, նվագում ու երգում են հիմնականում հայրենասիրական երգեր։

«Տեսանք, որ մարդկանց դուր է գալիս, մենք էլ կենդանի ձայնով ենք երգում, նվագում»,- ասում է Հմայակ Շահվերդյանը։

Նրանց երաժշտությունից դժգոհողներ էլ կան․ դա է պատճառը, որ հիմա կլառնետ չեն նվագում․ «Մեզ վրա ամեն ինչ էլ շպրտել են՝ պոմիդոր, սառույց, ինչ ասես։ Մեկ-երկու ընտանիք լազեր են գցում, հայհոյում են, զանգում են վարչություն»։

Երևանի քաղաքապետարանը որոշել է կանոնակարգել փողոցային երաժիշտների գործունեությունը։ Այս մասին քաղաքապետ Հրաչյա Սարգսյանը խոսեց խորհրդակցություններից մեկի ժամանակ։

«Հյուսիսային պողոտայում, Հանրապետության հրապարակում տարբեր երաժշտություններ են՝ «դըխկլը-ցըխկլը», չգիտեմ ինչ»,- նշել էր քաղաքապետը։

Տարածքային կառավարման և ենթակառուցվածքների նախարարությունն արդեն իսկ Երևանի ավագանուն լիազորել է կանոնակարգել ոլորտը։ Կսահմանվի Երևանում փողոցային երաժշտության թույլտվության տրամադրման կարգը․ նախագիծը հանրային քննարկման է դրվել։

Երաժիշտները դժգոհ են․ ասում են՝ նույնիսկ ամբողջ օրը նվագելով, երգելով՝ նորմալ գումար չեն վաստակում։

Հայկական էստրադայից մինչև իսպանական ֆլամենկո․ Միքայել Հովհաննիսյանի կիթառի հնչյունները կլսեք քաղաքի տարբեր հատվածներում առավոտյան 11-ից մինչև երեկոյան 9-ը։

«Բնակիչների մի մասը դժգոհում, բողոքում է, մյուս մասն ուրախ է, բայց հիմնականում ուրախ են»,- ասում է կիթառահարը։

18-ամյա երաժիշտը լսել է, որ հանրային վայրերում հնչող երաժշտությունը պիտի կանոնակարգվի։ Մտահոգված է, որ այդ դեպքում չի կարողանա գումար վաստակել։

Քաղաքապետարանը հիմնավորում է, որ փողոցում հնչող տարբեր ոճերի երաժշտությունը կարող է լուրջ անհարմարություններ պատճառել քաղաքացիներին ու զբոսաշրջիկներին։ Հանրապետության հրապարակում մեզ հանդիպած անցորդներին հաճելի է փողոցում հնչող երաժշտությունը, միայն թե ոճն է կարևոր։

Քաղաքապետարանի լրատվության վարչությունից Factor TV-ին հայտնեցին՝ կարգավորման չափանիշները դեռ քննարկման փուլում են։ Մինչ այդ, Երևանի փողոցներում կարող է հնչել ցանկացած երաժշտություն։

Մանրամասները՝ տեսանյութում։

Արփի Հակոբյան