Վաշինգտոնը՝ ՀՀ-ում խաղաղ հավաքներ անցկացնելու իրավունքի ոտնահարումների մասին․ զեկույց

ԱՄՆ Պետդեպարտամենտը հրապարակել է 2021 թվականի «Մարդու իրավունքների համաշխարհային զեկույցը», որում անդրադարձ կա նաև Հայաստանին։
Զեկույցում նշվում է, որ թեև նախընտրական քարոզարշավի ընթացքում ՀՀ կառավարությունը հիմնականում հարգել է հավաքների ազատությունը, տեղի դիտորդները ողջ տարվա ընթացքում արձանագրել են խաղաղ հավաքների վերաբերյալ կառավարության մոտեցման անհամապատասխանություններ:

«Օրինակ՝ օգոստոսի 23-ին ՀԿ-ները համատեղ հայտարարություն տարածեցին՝ քննադատելով ոստիկանությանը չափից ավելի կոշտ ուժ կիրառելու համար՝ Երևանի համայնքներից մեկում բարձրահարկ շենքի կառուցման դեմ բողոքի խաղաղ ցույցը ցրելու ժամանակ։ Ըստ հաղորդագրության՝ օգոստոսի 20-21-ը ոստիկանության հատուկ ստորաբաժանումները անհամաչափ ուժ են կիրառել քաղաքացիների նկատմամբ՝ ծանր վնասվածք հասցնելով մասնակիցներին, այդ թվում՝ անչափահասների և տարեցների, որոնցից երկուսը տեղափոխվել են հիվանդանոց։ Ըստ հաղորդագրության՝ ոստիկանությունը ոտնահարել է բերման ենթարկված քաղաքացիների իրավունքները՝ արժանապատվությունը նվաստացնող կարգով բռնի ուժով տեղափոխելով ոստիկանության բաժին՝ կիրառելով անհամաչափ միջոցներ և ապօրինի ընթացակարգեր։ Հաղորդվում է, որ  ծեծի է ենթարկվել 19-ամյա մի երիտասարդ։ Իշխանությունները մի քանի քրեական գործեր են հարուցել ցուցարարների դեմ, սակայն ներգրավված սպաների նկատմամբ որևէ գործողություն չի եղել։

Հավաքներ անցկացնելու ազատությունը սահմանափակվել է 2020 թվականի մարտին հաստատված արտակարգ դրության ընթացքում՝ COVID-19 համաճարակը զսպելու նպատակով։ Սահմանափակումները գործել են մինչև 2020 թվականի օգոստոսը, երբ կառավարությունը չեղարկեց հավաքների անցկացման սահմանափակումների մեծ մասը՝ թույլատրելով ցույցեր, երթեր և հանրահավաքներ՝ սոցիալական հեռավորության պահպանման ու դիմակներ կրելու պահանջներով: Հավաքների անցկացման ազատությունը սահմանափակվել է նաև ռազմական դրության ժամանակ, որը սահմանվել էր 2020 թվականի սեպտեմբերին՝ Լեռնային Ղարաբաղի հակամարտությունում ռազմական գործողությունների բռնկումից հետո»,- ասված է զեկույցում։

Տաթև Ֆռանգյան