Բռնաբարության փորձի համար մեղադրվողը «հրատապ մեկնել է սահման»

Այսօր Արագածոտնի մարզի ընդհանուր իրավասության դատարանի շենքի մոտ էին հավաքվել կանանց իրավունքների պաշտպաններ, որոնք արդար ու անաչառ դատաքննություն են պահանջում բռնաբարության փորձի գործով։ Գործը դատարանում է 2019 թվականի հուլիսից, դատական նիստերը հետաձգվում են տարբեր պատճառաբանությամբ, հաճախ՝ ամբաստանյալի չներկայանալու պատճառով։

Այսօր էլ ամբաստանյալը չէր ներկայացել, նրա պաշտպանը դատարանին հայտնել է, որ վերջինս «հրատապ մեկնել է սահման», թեև նա զինվորական չէ։ Պաշտպանը որևէ փաստաթուղթ չի ներկայացրել ամբաստանյալի՝ սահման մեկնելու վերաբերյալ։ Դատավոր Սուրեն Մնոյանը պահանջել է փաստաթղթեր ներկայացնել հաջորդ դատական նիստին, իսկ ամբաստանյալին բերման ենթարկելու որոշում է կայացրել։

Ըստ մեղադրանքի՝ Մ․Հ․-ն իր ծանոթ կնոջը խաբեությամբ տարել է հյուրանոցային համալիր և փորձել է սեռական հարաբերություն ունենալ նրա հետ։ Կնոջից մերժում ստանալով՝ ամբաստանյալը ձեռքերով բազմաթիվ հարվածներ է հասցրել նրա մարմնի տարբեր մասերին՝ պատճառելով նրա առողջությանը թեթև վնաս, փորձել է բռնաբարել նրան, սակայն իր կամքից անկախ հանգամանքներով չի կարողացել հանցագործությունն ավարտին հասցնել։

Մ․Հ․-ին մեղադրանք է առաջադրվել ՀՀ քրեական օրենսգրքի 34-138 (բռնաբարության փորձ) և 139 (սեքսուալ բնույթի այլ գործողությունները տուժողի կամքին հակառակ) հոդվածների առաջին մասերով։ Այս հոդվածներից յուրաքանչյուրով նախատեսված է 3-6 տարվա ազատազրկում։

Սեռական բռնության ճգնաժամային կենտրոնի սոցիալական աշխատող Անուշ Գաբրիելյանը Factor.am-ին հայտնեց, որ տուժողը ծանր հոգեբանական վիճակում է գտնվել բռնությունից հետո և նրա վիճակն էլ ավելի է վատանում դատական նիստերի ձգձգման պատճառով։ Նա այլևս հրաժարվում է դատարան ներկայանալ, քանի որ արդեն ցուցմունք տվել է դատարանում։ «Տուժողն ինքնուրույն է դիմել ոստիկանություն, հետո նոր ուղղորդվել է մեր կենտրոն»,- ասաց Գաբրիելյանը։

Տուժողի շահերը ներկայացնող փաստաբան Ինեսսա Պետրոսյանը Factor.am-ի հետ զրույցում նշեց, որ այս գործով պարզապես չի պատկերացնում ոչ մեղադրական դատավճիռ, քանի որ ապացույցներն ավելի քան բավարար են։ Դատաքննությունը, սակայն, անտեղի ձգձգվում է․  «Գործընթացի ձգձգման հետևանքով տեղի է ունենում կրկնակի զոհականացում, քանի որ շուրջ երեք տարի մենք չունենք արդարադատություն»,- ասում է փաստաբանը։

Դատական նիստերն անցնում են դռնփակ։ Հաջորդ դատական նիստը նշանակվել է ապրիլի 26-ին՝ ժամը 11։00-ին։

Արման Ղարիբյան