Սեյրան Օհանյանն Արցախի դրոշն ԱԺ ամբիոնում տեղադրեց, հայտարարելով՝ նիստերին չեն լինի, մեկնում են Արցախ․ ՏԵՍԱՆՅՈՒԹ

«Հայաստանի և Արցախի առաջ լրջագույն մարտահրավերներ են ծառացել՝ պայմանավորված համաշխարհային գլոբալ ճգնաժամով և Թուրքիայի ու Ադրբեջանի հակահայ վարքագծով»,- այս մասին, այսօր ԱԺ ամբիոնից հայտարարեց «Հայաստան» խմբակցության ղեկավար Սեյրան Օհանյանը:

««Հայաստան» և Պատիվ ունեմ» դաշինքների նախաձեռնած հանրահավաքում մեր հայրենակիցների կողմից նշվեցին երկրի անվտանգությանն առնչվող այն կարմիր գծերը, որից այն կողմ որևէ իշխանություն իրավունք չունի քայլ անել: Մեզ համար սակարկելի չեն ՀՀ անկախության հռչակագրում նշված դրույթները, մեր տրածքային ամբողջականությունը, սուվերենությունը: Անընդունելի ենք համարում ղարաբաղյան հակամարտության կարգավորման որևէ տարբերակ, որի դեպքում Արցախը կարող է հայտնվել Ադրբեջանի կազմում: Համոզված ենք, որ Հայաստանի օրվա իշխանություններն անկարող են լուծել ներքին ու արտաքին բազմաթիվ խնդիրներ: Վերջին զարգացումները հաստատում են այն մտահգությունները, որ ամեն ինչ ընթանում է ադրբեջանաթուրքական օրակարգով, կա պառնալիք ՀՀ տարածքային ամբողջականությանը, վտանգված է Արցախը: Այսպես կոչված, խաղաղության պայմանագրի շրջանակներում մեր ժողովրդի նախապատրաստում են նոր զիջումների, նոր պարտության, նոր նվաստացման:

Իրավիճակին ոչ համարժեք է իրեն դրսևորում խորհրդարանական մեծամասնությունը, որը մեր իրական օրակարգերն ԱԺ-ում առաջնահերթորեն քննարկելու, լուծումներ գտնելու փոխարեն բացարձակ ձեռնպահ կեցվածք է ընդունում, մանավանդ, երբ հարցը վերաբերում է Արցախին, և կցված լինելով գործադիր իշխանությանը՝ ապաքաղաքական է դարձնում երկրի թիվ մեկ քաղաքական ինստիտուտը՝ խորհրդարանը:

Ելնելով ստեղծված իրավիճակից՝ խորհրդարանական ընդդիմությունը հայտարարում է, որ չի մասնակցելու այս շաբաթվա նիստերին ու քվեարկություններին, մենք մեկնում ենք Արցախ ու ՀՀ սահմանամերձ մարզեր», – հայտարարեց Սեյրան Օհանյանը:

Նա Արցախի դրոշը տեղադրեցին ԱԺ ամբինոին՝ հայտարարելով. «Պաշտպանելով Արցախը՝ պաշտպանում ենք Հայաստանը.»:

Ընդդիմադիր պատգամավորները հետևեցին Օհանյանի օրինակին՝ Արցախի դրոշներ տեղադրելով սեղաններին:

«Պատիվ ունեմ» խմբակցության քարտուղար Հայկ Մամիջանյանը հայտարարեց, որ իրենք նույնպես չեն մասնակցելու քառօրյա նիստերին, մեկնում են Արցախ:

Մանրամասները՝ տեսանյութում: