Գարիկը հերոսացել էր հոր հետ հանդիպումից ժամեր անց. նորածին քույրն է ուրախություն բերել Հովակիմյանների ընտանիք․ ՏԵՍԱՆՅՈւԹ

44-օրյա պատերազմում որդուն՝ Գարիկին կորցրած Հովակիմյանների ընտանիքում երկարատև ընդմիջումից հետո դարձյալ ժպիտ կա։ 4 ամսական Մարիան փոխել ու վերաիմաստավորել է 23 տարվա ամուսինների կյանքը։ Կատարվածը հրաշքի պես բան է՝ ասում է 40-ամյա Ալլան, որը փոքրիկին բնական ճանապարհով է ունեցել։

«Ամեն ինչ Աստծո կամքով էր, Մարիան մեզ փրկեց այս ամեն ինչից»,- ասում է Ալլան։

Նրա խոսքով՝ որդու կորստից հետո չարացել էր աշխարհի դեմ, հիմա Մարիան է ապրելու ուժ տալիս։ 23 տարվա ամուսիններն ուզում էին հենց աղջիկ ունենալ, որ Գարիկը միակը մնար․ «Չէինք ուզում փոքրիկի մեջ Գարիկին փնտրել»։

Չնայած դրան՝ ամուսինները 4 ամսական Մարիային Գարիկին նմանացնում են։

Գարիկ Հովակիմյանը ծառայում էր Թալիշում, տանկիստ էր․ մեծ սիրով էր մեկնել ծառայության, 4 ամսից էլ տուն էր վերադառնալու։ Պատերազմի օրերին Գարիկը կռիվ է մղել Թալիշի, Մատաղիսի ու Մարտակերտի ուղղություններով։ Հայրը՝ Հակոբ Հովակիմյանը, պատերազմի հենց առաջին օրերից կամավորագրվել ու սահման էր մեկնել։ Մռավի լեռներն էր պաշտպանում։ Հոկտեմբերի 26-ին հայր ու որդի վերջին անգամ հանդիպեցին։

«Մի քանի ժամ հետո դեպքը պատահել էր, սնարյադն ընկել էր Գարիկի ու ծառայակիցների վրա»,- պատմում է մայրը։

Հենց նույն օրն էլ Ալլան խոսել է որդու հետ, ասել էր՝ չվախենաք, ամեն ինչ լավ է լինելու։

Տանն ամեն ինչ Գարիկին է հիշեցնում․ նրա հիշատակի անկյուն են ձևավորել, որտեղ տեղ են գտել լուսանկարները, խաչը, ժամացույցը, Մարտական ծառայության մեդալը։ Լուսանկարներից մեկն էլ Մարիայի սենյակում է, իսկ փոքրիկին տանկիստ եղբոր նկարով շապիկ են հագցնում, որ միշտ պահապան լինի նրան։

Թող բոլոր որդեկորույս մայրերը կրկին զգան մայրանալու բերկրանքը՝ ընդգծում է 40- ամյա Ալլան։

Մանրամասները՝ տեսանյութում։

Արփի Հակոբյան