Քաղաքականություն
07.04.2022 | 11:20«Պայմանավորվածությունների մասին տեղեկատվությունը տարածվել է երեկ՝ բավականին ուշ, չափավոր օպտիմիզմ է արտահայտել Շառլ Միշելը: Դեռ վաղ է խոսել հստակությունների մասին, բայց կողմերը որոշակի պատրաստակամություն են հայտնել բանակցություններում առաջ գնալու վերաբերյալ»,- այս մասին այսօր լրագրողների հետ զրույցում նշեց «Քաղաքացիական պայմանագիր» խմբակցության պատգամավոր Վլադիմիր Վարդանյանը:
«Բանակցությունները կարևոր գրավական ունեն հաջողությամբ պսակվելու, դրանցից մեկը ճկունությունն է և այնպիսի իրավիճակի չստեղծումը, որը կարող է խոչընդոտել բանակցությունները: Տվյալ պարագայում ներկայացվել են առաջարկներ, ՀՀ-ի կողմից ներկայացվել են կոնտրառաջարկներ, Մինսկի խումբը տեղեկացված է այդ մասին, գործընթացը շարունակվում է»,- նշեց Վարդանյանը:
Հիշեցնենք, որ Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպումը Բրյուսելում տեղի էր ունեցել ապրիլի 6-ին։
ՀՀ կառավարությունից հայտնել են, որ հանդիպման ժամանակ Նիկոլ Փաշինյանն անդրադարձել է ադրբեջանական ստորաբաժանումների վերջին գործողությունների հետևանքով Արցախում ստեղծված իրավիճակին, հումանիտար խնդիրներին:
Քննարկվել են 2020 թվականի նոյեմբերի 9-ի, 2021 թվականի հունվարի 11-ի, նոյեմբերի 26-ի եռակողմ հայտարարությունների, ինչպես նաև դեկտեմբերի 14-ին Բրյուսելում կայացած եռակողմ հանդիպմանը ձեռք բերված պայմանավորվածությունների կատարմանը վերաբերող հարցեր:
Հանդիպման արդյունքներով ձեռք է բերել պայմանավորվածություն` 2021թ. նոյեմբերի 26-ին Սոչիում ձեռք բերված համաձայնության համաձայն` մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որը օժտված կլինի նաև սահմանի երկայնքով անվտանգություն և կայունություն ապահովելու հարցերով:
Մանրամասները՝ տեսանյութում:
