19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Բուչայից 500-ից ավելի մարմին է հանվել․ չգիտենք՝ նրանց թվում հայեր կա՞ն, թե՞ ոչ․ Դավիթ Մկրտչյան. ՏԵՍԱՆՅՈՒԹ
Հասարակություն
06.04.2022 | 14:06
«Այս պահի դրությամբ՝ Ուկրաինայի հայերի մասով հաստատված 23 զոհ ունենք․ 18-ը՝ խաղաղ բնակիչների շրջանում, 5-ը՝ զինվորական։ Վիրավորների մասին տեղեկատվություն չունենք»,- այս մասին Factor TV-ի հետ զրուցում հայտնեց Ուկրաինայի հայերի միության փոխնախագահ Դավիթ Մկրտչյանը։
Նրա խոսքով՝ արդեն 5-րդ օրն է՝ Կիևում կրակոցներ չկան, ռուսական զորքերը դուրս են եկել Կիևի մարզից, արդեն լքում են նաև Չեռնիգովի և Սումիի մարզերը։
«Չեմ կարող ասել՝ նահանջո՞ւմ է հակառակորդը, թե՞ ոչ, բայց ավելի շատ հակված եմ այն մտքին, որ ռուսական կողմն ուղղակի փոխում է գործողությունների մարտավարությունը։ Իրենք զորքը հանում են մարզերից, ուկրաինական բանակն էլ նրանց հետապնդում է մինչև սահման և փորձում մինչև վերջ ոչնչացնել»,- նշեց Մկրտչյանը։
Անդրադառնալով հայերի տարհանման և Հայաստան վերադառնալ ցանկացողների դիմումներին՝ Ուկրաինայի հայերի միության փոխնախագահը նկատեց, որ վերջին օրերին չեն ստանում նման խնդրանքներ, նվազել է նաև այլ երկրներ տեղափոխվողների հոսքը։
«Միակ խնդիրը Մարիուպոլում է, որտեղ մարտի 2-ից որևէ կապ չկա։ Մարդիկ դուրս են գալիս «կանաչ միջանցքներով», կարողանում են նաև սնունդ և ջուր հասցնել ավտոբուսներով, բայց քաղաքը դեռ պաշարված է։ Իրավիճակն այլ է Բուչա և Իրպեն քաղաքներում․ այնտեղից 500-ից ավելի դիակ են հանել, բայց անունների ցուցակը դեռ մեզ չեն փոխանցել, չգիտենք՝ նրանց թվում հայեր կա՞ն, թե՞ ոչ»,- ասաց մեր զրուցակիցը։
Մանրամասները՝ տեսանյութում։
Ռոզա Վարդանյան
