Թմրանյութերի վաճառքի գովազդ՝ Գյումրու շենքերի վրա․ քաղաքապետարանը դիմել է ոստիկանություն․ ԼՈՒՍԱՆԿԱՐ

Մեկ շաբաթ է՝ Գյումրու տարբեր թաղամասերի, այդ թվում պատմական կենտրոնի շենքերի վրա հայտնվել են գրառումներ։ Քաղաքային իշխանությունների ներկայացուցիչները, զբոսավարները համոզված են, որ դրանց հեղինակները Telegram-ի միջոցով թմրանյութերի վաճառք իրականացնողներ են։ Դա պարզելու համար Գյումրու քաղաքային իշխանությունը դիմել է ոստիկանության Շիրակի մարզային վարչություն։

Այս մասին Factor.am-ի հետ զրույցում տեղեկացրեց Գյումրու փոխքաղաքապետ Դավիթ Առուշանյանը։ Նա հայտնեց, որ Գյումրու քաղաքապետարանի բնակկոմունալ բաժինը որոշ շենքերից հեռացրել է այդ գրառումները։ Ըստ նրա, որոշակի դժվարություն է ներկայացնում քաղաքի պատմամշակութային շենքերի վրայից այդ գրառումները հեռացնելը, քանի որ խնդիր կա շենքերը չվնասել։ Փոխքաղաքապետի հավաստիացմամբ, քաղաքային իշխանությունն ամենօրյա կապի մեջ է ոստիկանության հետ։ ՀՀ ոստիկանության լրատվական ծառայությունից մեզ փոխանցեցին, որ ոստիկանությունը համապատասխան ուսումնասիրություններ է կատարում՝ պարզելու, թե ովքեր են հեղինակները։

«Այս մասին առաջինն ահազանգել է Կումայրի արգելոց-թանգարանի տնօրենը, նա լուսանկարներ բերեց ու տեսանք, որ, ցավոք, նաև քաղաքի պատմամշակութային շենքերի վրա կան նման գրառումներ, օրինակ՝ կար Գյումրու ռեստորանի շենքում, որն արդեն մաքրել ենք։ Մենք ահազանգեցինք ոստիկանութուն, և մեր բնակկոմունալ բաժինը սկսեց մաքրման աշխատանքներ տանել», – Factor.am-ի հետ զրույցում ասաց Գյումրու փոխքաղաքապետ Դավիթ Առուշանյանը։

Պաշտոնյայի ասելով՝ չնայած քաղաքապետարանի բնակկոմունալ բաժնի աշխատակիցները մաքրում են, սակայն դրանք հայտնվում են նոր վայրերում։

Արմիկ Մովսիսյան