11.12.2024 | 23:30
Թուրքիան Մեծ Բրիտանիայից շահագործումից հանված Super Hercules ռազմատրանսպորտային ինքնաթիռներ կգնի
Բրյուսելում հանդիպել են Արմեն Գրիգորյանն ու Հիքմեթ Հաջիևը
Քաղաքականություն
31.03.2022 | 10:35
Բրյուսելում երեկ տեղի է ունեցել Հայաստանի Հանրապետության Անվտանգության խորհրդի քարտուղար Արմեն Գրիգորյանի և Ադրբեջանի նախագահի օգնական Հիքմեթ Հաջիևի հանդիպումը։ Այս մասին ասված է ԵՄ պաշտոնական կայքէջում։
Ըստ աղբյուրի՝ Հայաստանի և Ադրբեջանի բարձրաստիճան պաշտոնյաների հանդիպումը տեղի է ունեցել երկու երկրների միջև մի շարք խնդիրների լուծումներ գտնելու համատեղ ջանքերը զարգացնելու նպատակով: Մասնավորապես, քննարկվել են 2022 թվականի ապրիլի 6-ին Բրյուսելում Եվրոպական խորհրդի նախագահ Շառլ Միշելի, Ադրբեջանի Հանրապետության նախագահ Իլհամ Ալիևի և Հայաստանի Հանրապետության վարչապետ Նիկոլ Փաշինյանի առաջիկա հանդիպման նախապատրաստական աշխատանքները։
Տեղեկացվում է, որ Հայաստանի Հանրապետության Անվտանգության խորհրդի քարտուղար Արմեն Գրիգորյանի և Ադրբեջանի նախագահի օգնական Հիքմեթ Հաջիևի հանդիպումը կազմակերպել է Հարավային Կովկասում ԵՄ հատուկ ներկայացուցիչ Տոյվո Կլաարը։
«Առարկայական քննարկումների ընթացքում, որոնք ներառում էին նաև Հաջիևի և Գրիգորյանի երկկողմ առանձնազրույցը, մասնակիցները քննարկել են քաղաքական ու անվտանգային իրավիճակը, ինչպես նաև Հայաստանի և Ադրբեջանի միջև առկա հարցերի ամբողջ շրջանակը՝ որպես երկու երկրների առաջնորդների՝ դեկտեմբերի 14-ի հանդիպման ընթացքում ձեռք բերված փոխըմբռնումների շարունակություն»,- ասված է ԵՄ հաղորդագրության մեջ։
Մասնակիցները պայմանավորվել են կրկին հանդիպել առաջիկա շաբաթների ընթացքում: Ըստ ԵՄ կայքի՝ Հայաստանն ու Ադրբեջանը նաև կանդրադառնան կողմերի միջև խաղաղության համաձայնագրի հեռանկարներին վերաբերող հարցերին:
Տաթև Ֆռանգյան
