15.01.2025 | 14:11
36-ամյա տղամարդը դանակով հարվածել է հարևանին
Հարուստ ռուսները Թուրքիայում և ԱՄԷ-ում անշարժ գույք են գնում՝ պատժամիջոցներից թաքնվելու համար
Քաղաքականություն
30.03.2022 | 23:30
Հարուստ ռուսները գումար են ներդնում Թուրքիայում և ԱՄԷ-ում անշարժ գույքի շուկայում՝ ֆինանսական ապաստան փնտրելով Ուկրաինա ռուսական ներխուժման և արևմտյան պատժամիջոցներից հետո։ Այս մասին գրում է Duvar-ը՝վկայակոչելով անշարժ գույքի մի շարք ընկերությունների։
«Մենք ամեն օր յոթից ութ միավոր անշարժ գույք ենք վաճառում ռուսներին։ Նրանք կանխիկ են գնում, Թուրքիայում բանկային հաշիվներ են բացում կամ ոսկի են բերում»,- ասել է Ստամբուլում Golden Sign անշարժ գույքի ընկերության համահիմնադիր Գյուլ Գյուլը։
Նշվում է, որ չնայած արևմտյան պատժամիջոցներին՝ երկու երկրները լավ հարաբերություններ ունեն Մոսկվայի հետ և շարունակում են ուղիղ չվերթներ իրականացնել՝ պոտենցիալ երթուղիներ առաջարկելով ռուսների և նրանց կանխիկ գումարի համար:
«Նրանք պարզապես հարուստ ռուսներ են և ոչ թե օլիգարխներ։ Նրանք ուղիներ են գտնում իրենց գումարները Թուրքիա բերելու համար։ Կան հաճախորդներ, որոնք գնում են երեքից հինգ բնակարան»,- ասել է Գյուլը։
Ռուսները տարիներ շարունակ եղել են թուրքական անշարժ գույքի խոշոր գնորդներ՝ զիջելով իրանցիներին և իրաքցիներին, սակայն անշարժ գույքի շուկայի խաղացողներն ասում են, որ վերջին շաբաթների ընթացքում պահանջարկը մեծացել է:
Իբրահիմ Բաբաջանը, որի ընկերությունը Ստամբուլում կառուցում և վաճառում է անշարժ գույք հիմնականում օտարերկրյա գնորդների համար, ասել է, որ նախկինում շատ ռուսներ ցանկացել են ապրել այնպիսի հանգստավայրերում, ինչպիսին է Միջերկրական ծովի Անթալիայի շրջանը: Հիմա նրանք Ստամբուլում բնակարաններ են գնում՝ իրենց գումարները ներդնելու համար։
Ե՛վ Թուրքիան, և՛ Արաբական Միացյալ Էմիրություններն առաջարկում են կացության խթաններ անշարժ գույքի գնորդների համար: Թուրքիայում թուրքական անձնագիր կարող են ստանալ օտարերկրացիները, որոնք սեփականության համար վճարում են 250.000 դոլար և այն պահում երեք տարի։ Մի փոքր ավելի պակաս գումարով Դուբայը, որը Մերձավոր Արևելքի խոշոր բիզնես կենտրոնն է, առաջարկում է երեք տարվա կեցության վիզա:
Էմմա Չոբանյան
