10.10.2026 | 13:51
Ավինյանը շնորհավորել է Երևանի տոնը՝ կոչ անելով երևանցիներին դուրս գալ քաղաք և մասնակցել տոնակատարություններին
Թուրքիան կարող է իր ոստիկանական ուժերն ուղարկել Ադրբեջան՝ Ալիևին պաշտպանելու համար․ Nordic Monitor
Քաղաքականություն
30.03.2022 | 22:39
Թուրքիան և Ադրբեջանը պայմանավորվել են համատեղ ոստիկանական գործողություններ իրականացնել և համատեղ աշխատել «դիվերսիոն գործողությունների» դեմ ՝ ըստ նոր արձանագրության, որի պատճենը հայտնվել է Nordic Monitor-ի տրամադրության տակ։
Այս փաստաղթուղթը Թուրքիայի համար ճանապարհ է բացում՝ տարբեր սխեմաներով Ադրբեջանում ոստիկանական ուժեր տեղակայելու համար, այդ թվում՝ նախագահ Իլհամ Ալիևին աջակցելու համար, եթե «նա բախվի քաղաքացիական անկարգությունների կամ հակակառավարական ցույցերի», ինչը, անկասկած, դիվերսիոն գործունեություն է համարվելու։
Թուրքական ոստիկանության Անվտանգության գլխավոր վարչությունը Թուրքիայի գլխավոր իրավապահ մարմինն է, որն ունի մոտ 330,000 աշխատակից։ Այն նախագահ Ռեջեփ Թայիփ Էրդողանի ամենակարևոր գործիքն է՝ հակառակորդներին, քննադատներին և այլախոհներին բանտարկելու և վախեցնելու համար։
Էրդողանի կառավարությունը, մասնավորապես, հենվում է Չևիկ Քուվեթի մասնագիտացված ստորաբաժանման և համազգային ոստիկանական ուժերի վրա, որը բաղկացած է մոտ 30․000 հոգուց և հաճախ օգտագործվում է որպես կոպիտ ուժ՝ բողոքի ցույցերը ճնշելու համար։
Վերոնշյալ փաստաթուղթը թույլ է տալիս ոստիկանական ուժերի այս ստորաբաժանման անձնակազմերը տեղակայել նաև Ադրբեջանում։
2020 թվականի փետրվարի 25-ով թվագրված արձանագրությունը ստորագրել են Թուրքիայի Emniyet-ի ղեկավար Մեհմեթ Աքթաշը և Ադրբեջանի անվտանգության ծառայության ղեկավար Ալի Նագիևը։ Այն մի քանի ուղղումներ է մտցրել Անվտանգության ոլորտում համագործակցության մասին համաձայնագրում, որը երկու երկրների կողմից ստորագրվել է 2013 թվականի նոյեմբերի 13-ին:
Փաստաթուղթը Թուրքիայի խորհրդարանի հաստատմանն է ներկայացվել 2022 թվականի մարտի 25-ին և, ըստ հրապարակման, ամենայն հավանականությամբ, կընդունվի, քանի որ Էրդողանի կուսակցությունը և նրա դաշնակիցները վերահսկում են օրենսդիր մարմնի ձայներն ու օրակարգը։
Փոփոխությունները նաև ենթադրում են, որ Ալիևը ցանկանում է համոզվել՝ Էրդողանը թիկունք է կկանգնի իրեն քաղաքացիական անկարգությունների կամ բողոքի ցույցերի դեպքում և կարող է օգնություն կանչել, եթե դրա կարիքը լինի։
Էմմա Չոբանյան
