ԱՄՆ-ում կարծում են, որ Պուտինի խորհրդականներն ապատեղեկացնում են նրան Ուկրաինայում ռուսական ԶՈՒ գործողությունների մասին․ CNN

ԱՄՆ-ում կարծում են, որ Ռուսաստանի նախագահ Վլադիմիր Պուտինին իր խորհրդականներն «ապատեղեկացնում են» այն մասին, թե որքան վատ են ռուս զինվորականները գործում Ուկրաինայում և ինչպիսին է պատժամիջոցների ազդեցությունը Ռուսաստանի տնտեսության վրա։ Այս մասին CNN-ին ասել է ամերիկացի մի պաշտոնյա։

«Մենք հավատում ենք, որ Պուտինն ապատեղեկացվում է իր խորհրդականների կողմից, թե որքան վատ է գործում ռուսական բանակը Ուկրաինայում և ինչպես է ռուսական տնտեսությունն ազդվում պատժամիջոցների պատճառով, քանի որ նրա ավագ խորհրդականները չափազանց վախենում են նրան ասել ճշմարտությունը»,-ասել է պաշտոնյան, որի գնահատականը հիմնված է ԱՄՆ հետախուզության գաղտնազերծված տվյալների վրա:

Պաշտոնյան նաև ասել է, որ ԱՄՆ-ն ունի տեղեկություններ, որոնք վկայում են այն մասին, որ Պուտինը տեղյակ է եղել ապատեղեկատվության մասին, ինչը հանգեցրել է ՌԴ նախագահի և պաշտպանական ոլորտի բարձրագույն պաշտոնյաների միջև տարաձայնությունների:

«Մենք ունենք տեղեկություն, որ Պուտինը իրեն զգացել է ռուս զինվորականների կողմից մոլորության մեջ գցված։ Այժմ մշտական լարվածություն կա Պուտինի և Պաշտպանության նախարարության միջև, որը բխում է ՊՆ ղեկավարության նկատմամբ Պուտինի անվստահությունից»,- ասել է ամերիկացի պաշտոնյան։

Նա հավելել է, որ Պուտինը չի իմացել, որ իր զինվորականներն «օգտագործում և կորցնում են ժամկետային զինծառայողների Ուկրաինայում՝ ցույց տալով ՌԴ նախագահին տրամադրվող ճշգրիտ տեղեկատվության հոսքի հստակ խախտում»:

Էմմա Չոբանյան