29.07.2026 | 00:56
«Արարատ-Արմենիան» դուրս եկավ Չեմպիոնների լիգայի որակավորման երրորդ փուլ. ՏԵՍԱՆՅՈՒԹ
Թուրքիայում գնաճն ուկրաինական պատերազմի ֆոնին մարտին կգերազանցի 60%-ը և կպահպանվի ամբողջ տարվա ընթացքում․ ԶԼՄ-ներ
Քաղաքականություն
29.03.2022 | 23:30
Կանխատեսվում է, որ Թուրքիայում տարեկան գնաճի մակարդակը մարտին կավելանա ևս 7 տոկոսային կետով՝ մինչև 61․5 տոկոսով՝ պայմանավորված Ուկրաինա Ռուսաստանի ներխուժմամբ և ապրանքների գների աճով։ Այս մասին ասվում է Reuters-ի ուսումնասիրման մեջ, որը ներկայացնում է «Ահվալ» գործակալությունը։
Ռուս-ուկրաինական պատերազմը, որը թևակոխել է հինգերորդ շաբաթը, դրդել է տնտեսագետներին գնահատել համաշխարհային սպառողական գնաճը: Բնական գազի գները հասել են մի քանի տարիների առավելագույնին Ռուսաստանի դեմ պատժամիջոցների ֆոնին, որից Թուրքիան ստանում է բնական գազի իր մատակարարումների մեկ երրորդը:
Թուրքիայում սպառողական վստահությունը մարտին, վերջին երեք ամսվա ընթացքում առաջին անգամ, աճել է, մինչդեռ գնաճը երկրում հասել է երկու տասնամյակի առավելագույնին՝ այն բանից հետո, երբ Կենտրոնական բանկն անցյալ տարվա վերջին նախագահ Ռեջեփ Թայիփ Էրդողանի հրամանով տոկոսադրույքները նվազեցրեց մինչև 14 տոկոսի։ Սրան էլ հետագայում հաջորդեց լիրայի ռեկորդային արժեզրկումը։
Թուրքիայի գանձապետարանի և ֆինանսների նախարար Նուրեդդին Նեբաթին էլ անցյալ շաբաթ հայտարարել էր, որ «դոլարի նկատմամբ լիրան հասել է հատակին, և գնալու տեղ չունի», նաև կանխատեսել, որ արժույթը կայուն կմնա այն բանից հետո, երբ կառավարությունը հատուկ բանկային ավանդներ մտցրեց։
Reuters-ը նշում է, որ տարեկան գնաճը կազմում է 61․5 տոկոս, կանխատեսումները տատանվում են 58․25-62․7 տոկոսի սահմաններում։ Տնտեսագետները կանխատեսում են, որ գնաճը կպահպանվի մինչև տարեվերջ՝ վկայակոչելով տարածաշրջանային հակամարտությունը, որում Թուրքիան հանդես է գալիս միջնորդի դերում։
Հավելենք, որ Թուրքիայի վիճակագրական ինստիտուտը մարտ ամսի գնաճի տվյալները հրապարակելու է ապրիլի 4-ին։
Էմմա Չոբանյան
