«Ստեփանակերտում ալյուրի պակաս կա». առանց գազի հաց թխելը կրկնակի թանկացել է․ ՏԵՍԱՆՅՈՒԹ

Երեկվանից վերականգնել է Արցախի Հանրապետության գազամատակարարումը: Արցախի բնակավայրերը, այդ թվում՝ Ստեփանակերտը, շուրջ 20 օր զրկված էին բնական գազից, քանի որ Հայաստան-Արցախ գազատարն անցնում է Ադրբեջանի կողմից բռնազավթված տարածքով, իսկ թշնամական պետությունը նախ՝ վնասել, ապա փական էր դրել խողովակի վրա:

Գազամատակարարման ընդհատումն Արցախում հումանիտար ճգնաժամ էր առաջացրել: Բնակարաններն օրվա որոշ ժամերի ընդհանրապես չէին ջեռուցվում, քանի որ գազի բացակայությանը զուգահեռ՝ նաև էլեկտրամատակարարումն էր ընդհատումներով իրականացվում:

Գազամատակարարման դադարեցումը գրեթե կաթվածահար էր արել նաև Ստեփանակերտի հացի խոշոր գործարանի աշխատանքը: Երեկ օրվա առաջին կեսին՝ Factor TV-ի նկարահանման պահին, հացի արտադրամասում դեռ գազ չկար, իսկ էլեկտրաէներգիան պարբերաբար անջատվում էր:

Հացի արտադրամասի փոխտնօրեն Արմեն Ադամյանի խոսքով՝ գազ չեղած օրերին իրենց սպառած էլեկտրաէներգիայի վարձը կազմել է շուրջ 3 մլն դրամ, մինչդեռ 1 ամսում գազի ծախսը չէր գերազանցում 1,5 մլն դրամը։ Այս խնդրին գումարվել են նաև ալյուրի և մյուս ապրանքների գնաճը: Ստեփանակերտում, ըստ Արմեն Ադամյանի, ալյուրի խնդիր կա:

Հացի արտադրության ծավալները գազ չլինելու պայմաններում նվազել են՝ հասնելով ընդամենը 20 տոկոսի: Նախկին 25 պարկի փոխարեն հազիվ 10 պարկ ալյուրով են կարողացել հաց թխել:

Ստեղծված իրավիճակում երբեմն ստիպված են լինում անգամ պատրաստի խմորը թափել, քանի որ հոսանքի տատանումների պատճառով որակը կորցնում է:

Ստեփանակերտում, այնուհանդերձ, հացի խնդիր այս ընթացքում չի եղել: Խանութներին հաց նաև այլ արտադրամասեր են մատակարարել: Արտադրամասի փոխտնօրենի խոսքով՝ խանութներում հացը չի թանկացել: Ծախսերի աճի պայմաններում տնտեսվարողները դժգոհում են, որ պետությունից որևէ աջակցություն չեն ստանում:

Մանրամասները՝ տեսանյութում։

Նարեկ Կիրակոսյան