Ոտնձգություն` կին պարեկի նկատմամբ. խուլիգանություն կատարած անձը ձերբակալվել է․ ՏԵՍԱՆՅՈւԹ

Երեկ Դավիթ Բեկի փողոցում պարեկներն ավտոմեքենայի տեխզննում անցած չլինելու պատճառով կանգնեցրել են «Մերսեդես» մակնիշի մի ավտոմեքենա։ 50-ն անց ուղևորը իջել է մեքենայից ու հարվածել կին պարեկին, ապա հայհոյանքներ հնչեցրել։

«Մեքենային մոտեցած կին պարեկը ներկայանում է, մեքենան կանգնեցնելու հիմքը ներկայացնում և պահանջում է մեքենայի տեխանձնագիրն ու վարորդաական վկայականը։ Ուղևորն իջնում, քայլելով մոտենում է պարեկին ու հարվածում։ Դրանից հետո պարեկը ֆիզիկական ուժ ու հատուկ միջոցներ է գործադրել, և վարորդն ու ուղևորը բերման են ենթարկվել»,- Factor TV-ի հետ զրույցում դեպքից մանրամասներ պատմեց Պարեկային ծառայության ղեկավար Արթուր Ումրշատյանը։

Դեպքի առթիվ հարուցվել է քրեական գործ, մեկ անձ ձերբակալվել է։ Կին պարեկը, որը հիվանդանոց էր տեղափոխվել, ստացիոնար բուժում ստանալու կարիք չի ունեցել և դուրս է գրվել։

Հուլիսի 7-ին, երբ Երևանում ծառայությունը սկսեց պարեկային նորաստեղծ ծառայությունը, կին պարեկները բավականին շատ էին․ դա նկատելի էր անգամ սոցցանցերով տարածվող տեսանյութերում ու լուսանկարներում։ Factor.am-ը գրավոր հարցմամբ դիմել էր Պարեկային ծառայություն՝ պարզելու, թե քանի պարեկ է ընդգրկված ծառայությունում և նրանցից քանիսն է կին։

Ըստ գրավոր պատասխանի՝ Ոստիկանության Պարեկային ծառայության կազմում ընդգրկված է 669 պարեկային ծառայող․ նրանցից ընդամենը 42-ն է կին։ Հաշվի առնելով, որ պարեկային ծառայողները պետք է ներգրավված լինեն հանցավորության դեմ պայքարում, հարց է ծագում՝ որքանո՞վ են նրանք առհասարակ պատրաստ նման իրավիճակներին արագ արձագանքելուն։

Արթուր Ումրշատյանն ասում է՝ պարեկները ցանկացած պարագայում պաշտպանվելու տարբերակներ ունեն, պարզապես վերոնշյալ դեպքը հանկարծակի է տեղի ունեցել։ Պարեկային ծառայողները կրում են զենք և ունեն դրա կիրառման հիմքերը․ երեկ, սակայն, զենք կիրառելու անհրաժեշտություն չի եղել։

Կին պարեկները ներգրավված են Երևան քաղաքի տեղամասերում ծառայության՝ որպես ավտոպարեկներ և հետիոտնային երթուղիներում՝ որպես հետիոտն պարեկներ, ինչպես նաև «Զվարթնոց» օդնավակայանում իրականացվող ծառայություններում՝ ըստ հերթափոխերի ծառայող։

Մեր գրավոր հարցմանն ի պատասխան՝ Պարեկային ծառայությունից հայտնում են, որ ծառայության ներդրումից մինչ օրս պարեկների կողմից հայտնաբերվել, նախականխվել, կանխվել են բազմաթիվ հանցագործության դեպքեր, հայտնաբերվել են հետախուզվող անձինք։ Բայց ուշագրավ է, որ վերջին օրերին արձանագրվեց նաև պարեկների կողմից օրինախախտման դեպք․ ՀՀ ոստիկանության Պարեկային ծառայության աշխատակից Ա.Ա.-ն ձերբակալվել էր կաշառք ստանալու և այլ հանցավոր արարքներ կատարելու կասկածանքով, իսկ կաշառքի միջնորդություն և պաշտոնեական կեղծիք կատարած մի քանի պարեկների նկատմամբ քրեական հետապնդում է հարուցվել: Նախաքննությունը շարունակվում է։ Օրերս փոխոստիկանապետ Արա Ֆիդանյանն անդրադառնալով այս դեպքին՝ ասաց, որ իրենց համար ցավալի ու անսպասելի էր։ Ֆիդանյանը նաև հայտնեց, որ 5 պարեկ ազատվել է աշխատանքից։

Հավելենք, որ առաջիկայում պարեկային ծառայություն կներդրվի Լոռու ու Շիրակի մարզերում։ Կառավարության մարտի 17-ի նիստում վարչապետ Փաշինյանը կոչ արեց, որ կանայք ավելի ակտիվ մասնակցեն Պարեկային ծառայությունում աշխատանքի անցնելու գործընթացին։

Մանրամասները՝ տեսանյութում։

Արփի Հակոբյան