20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Խրամորթում կրակոցներ չեն հնչում, իրավիճակը հանգիստ է․ համայնքապետ
26.03.2022 | 15:13
Խրամորթում կրակոցներ չեն հնչում, իրավիճակը հանգիստ է․ համայնքապետ Խրամորթում, այս պահի դրությամբ, ամեն ինչ նորմալ է, իրավիճակը հանգիստ է։ Այս մասին Factor.am-ին հայտնեց ԱՀ Ասկերանի շրջանի Խրամորթ բնակավայրի համայնքապետ Զորիկ Աբրահամյանը՝ հավելելով, որ կրակոցներ չեն հնչում։
Նա տեղեկացրեց, որ իրենք շարունակում են մնալ գյուղում։ Ավելի վաղ Արցախի պետնախարար Արտակ Բեգլարյանը տեղեկացրել էր, որ ադրբեջանական զինված ուժերը շարունակում է մնալ Փառուխ գյուղում ու հարակից Քարագլուխ բարձունքի մի կողմում, իսկ քիչ առաջ այդ հատվածում անհաջող հարձակման փորձ են կատարել մեր մի զինված ստորաբաժանման ուղղությամբ:
Արցախի զինված ուժերը համապատասխան նախազգուշական ու զսպիչ միջոցներ է ձեռնարկում հնարավոր վտանգները չեզոքացնելու նպատակով:
Արցախի նախագահ Արայիկ Հարությունյանը խորհրդակցություն է հրավիրել՝ վերջին օրերին Ադրբեջանի զինված ուժերի կողմից իրականացվող սադրանքների հետևանքով ստեղծված իրավիճակի հետ կապված։
Հանդիպմանը մասնակցել են Արցախի ԱԽ քարտուղար Վիտալի Բալասանյանը, Տարածքային կառավարման և ենթակառուցվածքների նախարար Հայկ Խանումյանը, Հանրապետության շրջանների վարչակազմերի ղեկավարները։
Հիշեցնենք՝ մարտի 25-ին Ադրբեջանի կողմի սադրանքի հետևանքով հայկական կողմից զոհվել է 3 զինծառայող, ևս 15-ը վիրավորվել է։
Այսօր ժամը 11:00-ի սահմաններում Ադրբեջանի ԶՈւ ստորաբաժանումները կրկին դիմել են ագրեսիվ գործողությունների` տարբեր տրամաչափի հրաձգային զինատեսակների կիրառմամբ փորձելով առաջխաղացում ապահովել Արցախի Հանրապետության արևելյան սահմանագոտու ուղղությամբ, ՌԴ խաղաղապահ զորակազմի պատասխանատվության տակ գտնվող տարածքում: ԱՀ ՊԲ ստորաբաժանումները դիմել են համարժեք գործողությունների` հակառակորդի առաջխաղացումը կասեցնելու նպատակով:
Արփի Հակոբյան
