03.02.2026 | 23:21
Ֆրանսիան պատրաստ է լիակատար աջակցություն ցուցաբերել Հայաստանին COP17-ի կազմակերպման հարցում
Ուկրաինայի Ռադայի թվիթերյան գրառման հետքերով․ պարզաբանում հայ և ուկրաինացի դիվանագետներից. ՏԵՍԱՆՅՈՒԹ
Քաղաքականություն
25.03.2022 | 16:10
Ադրբեջանի զինված ուժերը հարձակման են անցել Ղարաբաղում՝ օգտվելով ռուս զինվորականներին Ուկրաինա ուղարկելուց։ Ուշ գիշերին Ուկրաինայի Գերագույն Ռադայի թվիթերյան պաշտոնական էջում այսպիսի բովանդակությամբ գրառում էր հայտնվել՝ սոցիալական ցանցերի հայկական տիրույթում վրդովմունքի ու քննադատության ալիք բարձրացնելով։
Ադրբեջանական սադրանքին աջակցող այս գրառմանն արձագանքել էր անգամ հայազգի հայտնի ռոք երաժիշտ, System of a down խմբի մենակատար Սերժ Թանկյանը։
«Հենց սա է պատճառը, որ հայերն աջակցում են Ուկրաինայի քաղաքացիներին, բայց ոչ նրանց կառավարությանը։ Նրանք շնորհավորում են Ադրբեջանի նավթաօլիգարխիկ բռնապետությանը հայերին իրենց պապենական հողերից բռնությամբ քշելու համար։ Ամո՛թ նրանց»,- գրել է Թանկյանը։
Որոշ ժամանակ անց պարզ դարձավ, որ Ռադայի պաշտոնական թվիթերյան էջից հեռացվել է աղմկահարույց գրառումը։ Ուկրաինայում Հայաստանի դեսպան Վլադիմիր Կարապետյանը Factor TV-ի հետ զրույցում տեղեկացրեց՝ Կիևում աշխատանքային օրը սկսվելուց 15 րոպե հետո է հրապարակումը ջնջվել՝ իր միջամտության արդյունքում։
Աղմուկ բարձրացրած գրառումը Ուկրաինայի Գերագույն ռադայի և Կիևի պաշտոնական դիրքոշումը չի արտահայտում։ Factor TV-ի հետ զրույցում նման հավաստիացում էլ արեց Ուկրաինայի գործերի ժամանակավոր հավատարմատար Դենիս Ավտոնոմովը։
«Գերագույն Ռադայում այդ հարցը քվեարկության չի դրվել, դրա համար չարժե այն գնահատել որպես Ուկրաինայի խորհրդարանի դիրքորոշում»,- նշեց նա։
Ավտոնոմովը հարկ համարեց, ամեն դեպքում, հիշեցնել՝ Ուկրաինայի պաշտոնական դիրքորոշումը Մոլդովայի, Վրաստանի, Ադրբեջանի և այլ երկրների տարածքային ամբողջականության վերաբերյալ մնացել է անփոփոխ անկախության տարիներից ի վեր։
Իսկ դիտարկմանը՝ արդյո՞ք գրառման նախաձեռնությունը եղել է Ուկրաինայի խորհրդարանի առանձին անդամների կողմից, նա արձագանքեց՝ տեղյակ չէ, թե նման հրապարակումների համար ով է որոշում կայացնում։
Մանրամասները՝ տեսանյութում։
