16.07.2026 | 01:03
ԱԱ-2026․ Եզրափակիչում՝ Իսպանիա – Արգենտինա․ ՏԵՍԱՆՅՈՒԹ
Գյումրու քաղաքապետարանի նոր հաստիքացուցակը մերժվել է
Քաղաքականություն
24.03.2022 | 19:57
ՀՀ տարածքային կառավարման և ենթակառուցվածքների նախարարությունը չի հաստատել Գյումրու համայնքապետարանի կողմից ներկայացված կառուցվածքային փոփոխությունները, որոնց հիման վրա կազվել էր նոր հաստիքացուցակը։ Քաղաքի ավագանին այն քննարկել ու հաստատել էր ավագանու 2021-ի դեկտեմբերի 27-ի նիստում։
Ըստ կառուցվածքային փոփոխությունների, գովազդի բաժինն առանձնացվելու էր առևտրի բաժնից, ծրագրերի և արտաքին կապերի բաժինն անվանափոխվելու էր ՝ դառնալով տուրիզմի և արարողակարգի բաժին, ստեղծվելու էր վերահսկողության բաժին։
Գյումրու համայնքապետարանի աշխատակազմի քարտուղար Կարեն Բադալյանը մեզ հետ զրույցում փաստեց, որ նախարարությունը չի հաստատել՝ իր դիտարկումները ներկայացնելով։ Շիրակի մարզպետարանի տեղական ինքնակառավարման և հանրապետական գործադիր մարմինների հարցերով վարչության պետ Արամ Անտոնյանից տեղեկացանք, որ Շիրակի մարզպետարանը ևս կարծիք է ներկայացրել նախարարություն այս թեմայի շուրջ։
Գյումրու համայնքապետարանի տուրիզմի և արարողակարգի բաժինը պիտի զբաղվեր համայնքի զարգացման ծրագրերով, բաժնի անվան մեջ այս գործառույթը պիտի արտացոլվեր, մինչդեռ բաց է թողնված, սակայն նախատեսված էր, այս բաժնի երկու աշխատակից պիտի զբաղվեին հենց զարգացման ծրագրերով։
Վերահսկողության բաժին ստեղծելու պարագայում էլ մարզպետարանը խնդրել է հիմնավորել՝ ով ում պիտի վերահսկի։ Վերահսկողության նորաբաց բաժնում պիտի աշխատեն համայնքային ծառայողներ, այդ դեպքում հարց է առաջանում ՝ ո՞ր օրենքով համայնքային մի ծառայողն իրավունք ունի մյուս ծառայողին վերահսկելու։
«Երբ քաղաքապետարանում աուդիտի բաժին կար, այն կարգավորվում էր առանձին օրենքով, տարեկան աշխատանքային ծրագիր ուներ, հաստատությունների ցանկ ունեին, որը հաստատվում էր համայնքի ղեկավարի կողմից, մտնում և ուսումնասիրություններ էին կատարում։ Այս դեպքում դարձյալ վերահսկղություն չէր, ուսումնասիրում էին ընթացիկ գործունեությունը»,- ասում է Արամ Անտոնյանը։
Շիրակի մարզպետարանն առաջարկել է՝ եթե վերահսկողություն են ուզում իրականցնել, ապա այդ գործառույթը կարող են իրականացնել տեղակալների կամ հայեցողական պաշտոն զբաղեցնողների միջոցով, ասենք՝ բաժիններ առանձնացվեն ու վերահսկելու պարտականությունը դնեն խորհրդրականներից որևէ մեկի ուսերին։
Նախարարությունը, բնականաբար, հաշվի է առել Շիրակի մարզպետարանի դիրքորոշումը ու Գյումրու համայնքապետարանի նոր հաստիքացուցակը ուղարկել է վերանայման։ Համայնքային ծառայողների պաշտոնների անվանացանկը հաստատվում է նախարարի հրամանով։
Արմիկ Մովսիսյան
