07.10.2026 | 21:02
Կանանց Հայաստանի հավաքականը հաղթեց Հորդանանին
Փաշինյանի փաստաբանը գրիչի գործով վերաքննիչ բողոք է ներկայացրել
Հասարակություն
24.03.2022 | 14:03
Երևան քաղաքի ընդհանուր իրավասության դատարանի դատավոր Գայանե Խաչատրյանի վճռով՝ ՀՀ վարչապետ Նիկոլ Փաշինյանը պարտավորեցվել էր հերքել Սահմանադրական դատարանի նախկին նախագահ Հրայր Թովմասյանի վերաբերյալ հայտարարությունները, որոնք դատարանը ճանաչել էր որպես զրպարտություն պարունակող։ Մարտի 18-ից սկսած Նիկոլ Փաշինյանը հինգ աշխատանքային օրվա ընթացքում Facebook սոցիալական կայքի՝ իրեն պատկանող պաշտոնական էջում «Հերքում՝ Հրայր Թովմասյանի հասցեին կատարված զրպարտություն հանդիսացող տեղեկության վերաբերյալ» վերնագրով գրառում պիտի կատարեր՝ դրանում նշելով հետևյալը. «Ես՝ Նիկոլ Փաշինյանս, հերքում եմ իմ այն պնդումը, որ Հրայր Թովմասյանը 2018 թվականի մայիսից սկսած ինձ իր ծառայություններն է առաջարկել»: Փաշինյանը, սակայն, հերքում չի հրապարակել։ Նիկոլ Փաշինյանի փաստաբան Գևորգ Գյոզալյանը Factor.am-ին հայտնեց՝ պատճառն այն է, որ իրենք վերաքննիչ բողոք են ներկայացրել․ «Մեկ շաբաթ առաջ ենք ներկայացրել»։
Հիշեցնենք՝ երկու տարի առաջ Փաշինյանը պնդել էր, թե Հրայր Թովմասյանը հեղափոխությունից հետո իր ծառայություններն է առաջարկել նոր իշխանություններին։ Հրայր Թովմասյանը դատարանին խնդրել էր Փաշինյանին պարտավորեցնել վիրավորանք հանդիսացող արտահայտությունների համար ներողություն խնդրել, ինչպես նաև հերքել զրպարտություն հանդիսացող տեղեկությունները։ Դատարանը բավարարել էր Թովմասյանի հայցը։
Արփի Հակոբյան
