Խուզարկություն` երեխային կորցրած մոր տանը․ ինչ են փնտրել և առգրավել քննիչները․ ՏԵՍԱՆՅՈւԹ

Այսօր առավոտից քննիչները, դատարանի որոշմամբ, խուզարկում էին Հայկուհի Խաչատրյանի՝ Զովունիում գտնվող տունը։ Հայկուհին 2019-ի սեպտեմբերի 24-ին ծննդաբերել էր հանրապետական ծննդատանը, բայց երեխային այդպես էլ չէր տեսել։ Բժիշկները հայտնել էին, որ փոքրիկը ծնվել է մահացած։ Ծնողները պնդում են՝ իրենք երեխայի դին չեն տեսել։ Հարուցվել էր քրեական գործ՝ քրեական օրենսգրքի 130-րդ հոդվածի 2-րդ մասով, այն է՝ բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է մահ։ Խուզարկությունը կապված էր հենց այս քրեական գործի հետ։

«Դին չկար, հետո ասացին՝ հերձել ենք, օրգաններ ենք պահել, իսկ դին այրել ենք, օրգաններն էլ քայքայված են, ասացի՝ տվե՛ք քայքայված օրգանները, ես ԴՆԹ փորձաքննություն կիրականացնեմ»,- մեզ հետ զրույցում պատմեց Հայկուհի Խաչատրյանը, որը խոսելիս դիմադրում էր գործով քննիչի ու փորձագետների՝ դատարանի որոշումն իրականացնելուն։

Կնոջ հղիությունը հսկած մանկաբարձ-գինեկոլոգ Ռուզաննա Քեհյանը դեպքից օրեր անց լրատվամիջոցներին հայտնել էր, որ ծննդկանը երեխայի դին տեսնելու ցանկություն չի հայտնել, բացի այդ հրաժարվել է հետազոտություններից․

«9 ամիս ինքը եղել է իմ հսկողության տակ: Սակայն որոշակի ժամկետներում, երբ իրեն առաջարկվել է ավելի խոր հետազոտություն, որը ցուցված է եղել իրեն ութերորդ հղիության և երկու անգամ չզարգացող հղիություն ունեցող կնոջ մոտ, նա հրաժարվել է: Նույնիսկ հրաժարվել է որոշակի շատ կարևոր սկրինինգային հետազոտություններից: Ընդունվել է ամսի 24-ին: Ժամը 17-ն անց կես հայտնաբերվել է անտենատալ պտղի մահ, որի մասին նա տեղյակ էր, և դա ապացուցվել է էխոգրաֆիկ հետազոտությունով: Ծննդաբերել է մեռելածին: Բացի վարող բժշկից, մանկաբարձից, ծնարանում գտնվում էին նաև բույժքույրերը, մայրապետները, որոնք տեսել են, որ պտուղը մահացած է ծնվել: Ծննդաբերությունը ավարտելուց հետո, երկուս ու կես ժամ անց նաև սառնարանում դրված երեխային դին տեսել է իր քույրը»,- 2019-ին պատմել էր մանկաբարձ-գինեկոլոգ Քեհյանը։

Հայկուհուց խնդրեցինք քրոջ հեռախոսահամարը, ասաց՝ Ռուսաստանի Դաշնությունում է, իսկ հեռախոսահամարն անհասանելի է։

Դատարանի որոշման մեջ նշվում է, որ քննիչները խուզարկում էին առանձնատունը, որպեսզի տուժող ճանաչված Հայկուհի Խաչատրյանից և ամուսնուց անջատված ԴՆԹ պարունակող իրեր և առարկաներ, ինչպես նաև Հայկուհի Խաչատրյանի կողմից սեփական նախաձեռնությամբ ենթադրաբար իրականացված նմուշի հետազոտության արդյունքների վերաբերյալ բժշկական և դրանց հետ կապված այլ փաստաթղթեր, մահացած պտղի և ամուսինների միջև արյունակցական կապը հաստատող կամ հերքող առարկաներ հայտնաբերեն։

Սակայն թե՛ Հայկուհին, թե՛ ամուսինը համաձայնություն չէին տվել, որ իրենցից նմուշառումներ վերցվեն։ Քննչական կոմիտեից Factor.TV-ին հայտնեցին, որ ամուսինները այդպես էլ հաձայնություն չեն տվել նմուշառումներ վերցնելու, քննիչները կարողացել են նմուշառում անել միայն հագուստներից։ Հայկուհին էլ ասում է՝ քննիչներն իր վրա բռնություն գործադրելով հարկադրաբար վերցրել են նմուշառումներ։

Մանրամասները՝ տեսանյութում։

Արփի Հակոբյան