20.04.2026 | 21:09
Վենսը երեքշաբթի կմեկնի Վաշինգտոնից` Պակիստանում Իրանի հետ բանակցությունների մասնակցելու համար. CNN
Ալեն Սիմոնյանն Ինդոնեզիա շրջագայության համար չի մեկնել. Ռուբինյանը չնշեց՝ որքան գումար է դա արժեցել․ ՏԵՍԱՆՅՈՒԹ
Քաղաքականություն
22.03.2022 | 10:46
«Այս էլ որերորդ անգամ ԱԺ լիագորմար նիստերի ժամանակահատվածում Ալեն Սիմոնյանը մեծ խմբով մեկնում է գործուղման, իսկ իրականում տուրիստական շրջագայության, և դա բնականաբար պետական բյուջեի հաշվին»,- այս մասին այսօր ԱԺ-ում նշեց «Հայաստան» խմբակցության պատգամավոր Արեգնազ Մանուկյանը:
Պատգամավորը հետաքրքրվեց, թե ինչով է պայմանավորված 11 հոգանոց պատվիրակության մեկնումն Ինդոնեզիա: «Ինչքա՞ն է դա նստելու Հայաստանի հպարտ հարկատուների վրա, ինչ արդյունքներ է ստանալու Հայաստանն այդ այցից»,- ասաց նա:
ԱԺ փոխխոսնակ Ռուբեն Ռուբինյանն անդրադառնալով այդ հարցին, նշեց. «Տեղեկացնեմ, որ Ազգային ժողովն ունի տարբեր միջխորհրդարանական հարթակներում պատվիրակություններ: Պատվիրակությունների կազմերը հաստատվում են ԱԺ խորհրդի կողմից, որի անդամ են նաև ձեր խմբակցության ներկայացուցիչները: Ալեն Սիմոնյանը չի մեկնել Ինդոնեզիա շրջագայության, Ալեն Սիմոնյանը մեկնել է որպես միջխորհրդարանական միությունում Հայաստանի ԱԺ պատվիրակության ղեկավար»:
Ընդդիմադիր պատգամավորն այդ պատասխանը համարեց խուսափողական և նշեց. «Ուզում եմ ընդգծել, որ այս խորհրդարանում Ալեն Սիմոնյանը միակը չէ, որ տուրիստական տոմս է շահել: ՔՊ-ի պատգամավորները հերթով մեկնում են շրջագայությունների՝ զրո արդյունք տալով Հայաստանին և լիքը անձնական տպավորություններ ստանալով, և կրկին բյուջեի հաշվին»:
Ռուբինյանը հիշեցրեց, որ ԱԺ կայքում հրապարակվում են ԱԺ նախագահի որոշումները, ներկայացված են բոլոր պատվիրակությունների այցերի նպատակները, ծախսերը, կազմերը. «Տեղեկացնեմ, որ պարբերաբար տրվում են հաշվետվություններ, տեղեկացնեմ նաև, որ ձեր նշած շրջագայությունների ընթացքում, ցավոք, հաճախ միայն ՔՊ-ի պատգամավորները մեկնում են և բարձրաձայնում են այն հարցերը, որոնք բխում են Հայաստանի և Արցախի շահերից: Օրինակ, ես կարող եմ խոսել որպես ԵԽԽՎ պատվիրակության ղեկավար և ձեզ հիշեցնել վերջերս ընդունված երկու բանաձևի մասին, որտեղ կան կետեր, որոնք շատ կարևոր են մեզ համար: Ձեզ էլ խորհուրդ կտամ փոխել ձեր ոճը, որովհետև արդեն հոգնեցնում եք»:
Մանրամասները՝ տեսանյութում:
