21.02.2026 | 23:36
Հենրիխ Մխիթարյանի գոլը սկիզբ է դրել «Ինտերի» հաղթանակին․ ՏԵՍԱՆՅՈՒԹ
Ապրիլին Բրյուսելում նախատեսվում է Փաշինյան-Ալիև հանդիպում
Քաղաքականություն
22.03.2022 | 00:05
Ապրիլ ամսվա ընթացքում նախատեսվում է ՀՀ վարչապետ Նիկոլ Փաշինյանի այցը Բրյուսել, որի ընթացքում տեղի կունենա Փաշինյան-Ալիև հանդիպում: Այս մասին այսօր խորհրդարանում «Քաղաքացիական պայմանագիր» խմբակցության հետ փակ հանդիպման ընթացքում հայտնել է վարչապետը:
Տեղեկությունը Factor.am-ին հայտնեցին ՔՊ պատգամավորներից։ Ըստ մեր աղբյուրի` Փաշինյանը նշել է, որ հանդիպման նախաձեռնությունը Եվրոպական միությանն է:
Հիշեցնենք՝ Նիկոլ Փաշինյանը 2021 թվականի դեկտեմբերին ևս Բրյուսելի միջնորդությամբ հանդիպում էր ունեցել Ալիևի և Եվրոպական խորհրդի նախագահ Շառլ Միշելի հետ: Ապրիլին նախատեսվում է նաև Փաշինյանի այցը Ռուսաստանի Դաշնություն՝ Վլադիմիր Պուտինի հրավերով: Բրյուսելյան այցը կհաջորդի Մոսկովյան այցին: Ի դեպ, այսպես եղավ նաև նախորդ տարվա դեկտեմբերին: Նիկոլ Փաշինյանն ու Իլհամ Ալիևը մինչ Բրյուսելում հանդիպելը նոյեմբերի 26-ին Սոչիում հանդիպեցին Վ. Պուտինին: Փաշինյանը պատգամավորների հետ այսօրվա հանդիպման ընթացքում պատասխանել է Արցախի շուրջ տեղի ունեցող զարգացումներին, անդրադարձել գազամատակարարման խնդրին, սահմանային լարվածությանը: Իսկ ահա
Բաքվի ներկայացրած հինգ կետերի վերաբերյալ Փաշինյանը թիմակիցներին վստահեցրել է, որ Ադրբեջանի առաջարկները սահմանափակվում են այդքանով. հրապարակել են այն, ինչ ուղարկվել է:
Հիշեցնենք՝ Ադրբեջանն առաջարկում է ճանաչել միմյանց տարածքային ամբողջականությունը, միմյանց տարածքային պահանջներ չներկայացնել, սահմանազատում իրականացնել, դիվանագիտական հարաբերություններ հաստատել ու բացել տրանսպորտային ուղիները։
Նարեկ Կիրակոսյան
Լուսանկարը՝ 2020թ․ Փաշինյան-Ալիև մյունխենյան հանդիպումից։
