14.09.2026 | 15:10
Ռուբինյանի արձագանքը Հաջիևի հայտարարություններին // Ռոբերտ Քոչարյանը սրտաբանի հսկողության ներքո է․ ԼՈՒՐԵՐ
Հայաստանից Ուկրաինա արտահանումները դադարել են, իսկ դեպի ՌԴ՝ նվազել
Տնտեսություն
21.03.2022 | 13:37
Պարզելու համար, թե ռուս-ուկրաինական հակամարտության հետևանքով ինչ խնդիրների և խոչընդոտների են բախվել արտահանող հայկական ընկերությունները Factor.am-ը գրավոր հարցում էր ուղարկել ՀՀ էկոնոմիկայի նախարարությանը։
Մեր հարցմանն ի պատասխան նախարարությունից հայտնում են, որ ռուս-ուկրաինական հակամարտության հետևանքով Հայաստանից Ուկրաինա արտահանումները դադարել են, և արտահանողները լուրջ կորուստներ կարող են ունենալ մինչ պատերազմական գործողություններն արտահանված ապրանքների արժեքը ստանալու հարցում։
Նախարարության տեղեկացմամբ, ՀՀ-ից Ռուսաստանի Դաշնություն արտահանումները շարունակվում են, սակայն դրանց տեմպերը նվազել են ռուբլու կտրուկ արժեզրկման պատճառով, քանի որ մատակարարվող ապրանքների համար նոր գների առաջարկման մասով ցուցաբերվում է զգուշավորություն:
«Որոշ տնտեսվարողներ նոր խմբաքանակների առաքման համար առաջարկում են բարձրացված գներ, որոնք ևս ամբողջությամբ չեն փոխհատուցում ՌԴ արտարժույթի փոխակերպման (կոնվերտացիայի) ժամանակ առաջացող վնասների չափը: Բացի այդ, տնտեսվարողներն ավելի շատ վնասներ են կրում մինչև պատերազմական գործողություններն առաքված ապրանքների արժեքի ստացումից»,- ասվում է մեր հարցմանն ի պատասխան։
Էկոնոմիկայի նախարարությունից տեղեկացնում են, որ արտահանողների մոտ արդեն իսկ առաջացել են խնդիրներ, և դրանց վերաբերյալ գերատեսչությունը այս ընթացքում ստացել է մի շարք ահազանգեր, որոնց հիման վրա մասնավոր հատվածի ներկայացուցիչների հետ նախարարությունում կազմակերպվել են ինչպես ոլորտային, այնպես էլ ընդլայնված քննարկումներ։
Քննարկումների ժամանակ ներկայացված խնդիրների և դրանց լուծման ուղիների վերաբերյալ առաջարկությունների հիման վրա նախարարության կողմից մշակվում են աջակցության միջոցառումներ։
Նախարարությունից հայտնում են նաև, որ առկա խնդիրները մեղմելու նպատակով իրենք այսօրվա դրությամբ դիտարկում են գյուղատնտեսական հումքի մթերումների (գնումների) նպատակով տրամադրվող վարկերի տոկոսադրույքների սուբսիդավորման ծրագրի շրջանակներում տրամադրված վարկերի համար սահմանված արտոնյալ և մայր գումարի մարման ժամկետները երկարաձգելու հնարավորությունը:
Մշակման փուլում է նաև արտաքին տնտեսական մարտահրավերներով պայմանավորված արտահանում իրականացնող տնտեսվարողների օժանդակության միջոցառումը հաստատելու մասին ՀՀ կառավարության որոշման նախագիծը:
Մերի Մաթևոսյան
