«Ժողովրդական այսօրվա ցասումը տանելու է Սերժ Սարգսյանի ձերբակալմանը»․ Հրանուշ Խառատյան

Ազգագրագետ Հրանուշ Խառատյանը ֆեսբուքյան էջում զգուշացնում է, որ ժողովրդական այսօրվա ցասումը տանելու է Սերժ Սարգսյանի ձերբակալմանը:

«Նա իշխանությունից հեռացման այլ տարբերակ, հնարավորություն չի թողնում: Ուժային կառույցները ղեկավարողն արդեն իսկ բազմաթիվ առիթներ է տվել, իրավական հիմք է առնվազն երեք պատգամավորների ձերբակալությունը՝ առանց Ազգային Ժողովի համաձայնության, և հասարակության մեջ անթաքույց տեռորի մթնոլորտ ստեղծելու ահռելի ճիգերով: Մի շարք խաղաղ, օրինական, իրավական տարբերակներ կան առկա ճգնաժամը հաղթահարելու, բայց նա դեմագոգիկ հայտարարություններով ամեն, ամեն ինչ անում է իրեն քաջ հայտնի մեթոդներով խաղաղ ցուցարարների դեմ անհամաչափ ուժի կիրառելու և այդ կիրառումն արդարացնելու, հասարակության մեջ վախ ու սարսափ տարածելու, ինչպես տարածել է իր կուսակիցների մեծ մասի մեջ: Մնում է միայն, որ նա տանկեր հանի ժողովրդի դեմ: Կհանի, իհարկե, եթե ձեռքերը կապված չլինեն ԵՄ երկրների դեսպանատների ներկայությամբ: Հանի՝ կդառնա միջազգային իզգոյ»,- գրել է Խառատյանը:

Ամեն ինչից զատ, ըստ Հրանուշ Խառատյանի, վարչապետ Սերժ Սարգսյանը պարզապես իրավունք չունի իրեն բացարձակ չվստահող հասարակության կառավարման համակարգում որևէ դերկատարում ունենալ: «Ի վերջո Սերժ Սարգսյանը հասնելու է նրան, որ ուզուրպատորի միանձնյա ղեկավարությանը համաձայնած Հանրապետական կուսակցությունը զրկվի ընտրություններին մասնակցելու իրավունքից, իսկ անհատ հանրապետականները՝ կառավարման համակարգում աշխատելու իրավունքից: Հաստատ, սա հանրապետականների ամենամեծ երազանքը չէ: Եվ որքան նրանք լուռ կամ ակտիվ մասնակցեն դեպքերի այս ընթացքին, այնքան այդ հեռանկարը դառնալու է գործնական»։