Ռուսաստանը դուրս է գալիս Եվրոպայի խորհրդից

Եվրոպայի Խորհրդի գլխավոր քարտուղար Մարիա Պեյչինովիչ-Բուրիչը նամակ է ստացել Ռուսաստանի Դաշնության արտաքին գործերի նախարար Սերգեյ Լավրովից, որում տեղեկացվում է կազմակերպությունից դուրս գալու՝ Ռուսաստանի որոշման մասին։ Այս մասին հայտնել է ԵԽԽՎ-ում Ռուսաստանի պատվիրակության ղեկավար Պյոտր Տոլստոյը։ Նրա խոսքով՝ «Ռուսաստանն իր կամքով է դուրս գալիս Եվրոպայի խորհրդից, դա կշռադատված  և մտացված որոշում է», գրում է DW-ի ռուսական ծառայությունը։

Իր հերթին, Դաշնային խորհրդի փոխխոսնակ Կոնստանտին Կոսաչովը երեքշաբթի հայտարարել է, որ Ռուսաստանը չեղյալ կհայտարարի Եվրոպայի խորհրդի կանոնադրությունը, Մարդու իրավունքների եվրոպական կոնվենցիան և ևս չորս կոնվենցիաներ, որոնց մասնակցությունը նախատեսված է միայն կազմակերպության անդամների համար։ Բացի այդ, ըստ նրա, կչեղարկվեն մի շարք փաստաթղթեր, որոնց մասնակցությունը հնարավոր է ԵԽ անդամ չհանդիսացող երկրների համար, սակայն դրանք չեն համապատասխանում Ռուսաստանի Դաշնության շահերին։

Մարտի 14-ին Ստրասբուրգում բացվել է Եվրոպայի խորհրդի խորհրդարանական վեհաժողովի (ԵԽԽՎ) երկօրյա նստաշրջանը։ Երեքշաբթի օրը տեղի ունեցած քննարկումների ընթացքում պատգամավորները նախատեսում էին քննարկել «Ռուսաստանի Դաշնության ագրեսիայի հետևանքները Ուկրաինայի դեմ» բանաձևը, որում վեհաժողովը պետք է իր հանձնարարականները տա Եվրոպայի խորհրդի Նախարարների կոմիտեին՝ կապված որպես կազմակերպության մաս Ռուսաստանի ապագա ճակատագրի հետ:

Խոսքը կանոնադրության 8-րդ հոդվածի կիրառման մասին է, որտեղ ասվում է, որ այն երկիրը, որը կոպտորեն խախտում է կազմակերպության հիմնական սկզբունքները, «կարող է ժամանակավորապես զրկվել ներկայացուցչության իրավունքից», և «Նախարարների կոմիտեն կարող է խնդրել նրան դուրս գալ Եվրոպայի Խորհրդի կազմից»։

Տաթև Ֆռանգյան