15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
1 շաբաթ՝ առանց գազամատակարարման․ Արցախում չգիտեն, թե խնդիրը երբ կլուծվի
Տնտեսություն
14.03.2022 | 12:15
Արցախում արդեն 7-րդ օրն է գազամատակարարում չկա, էլեկտրամատակարարումն էլ՝ ժամանակ առ ժամանակ անջատվում է։ Արցախում սա լուրջ խնդիր է դարձել, հաշվի առնելով, որ վերջին օրերին ձյուն է տեղում և ջերմաստիճանն էլ պարբերաբար իջնում է 0-ից։
Արցախի մարդու իրավունքների պաշտպանի աշխատակազմի կողմից կատարված ուսումնասիրությունների և իրավապահ մարմինների հետ քննարկումների արդյունքում պարզվել է, որ գազատարը վնասված է այն հատվածում, որը գտնվում է ադրբեջանական զինված ուժերի վերահսկողության տակ․
««Արցախգազ» ՓԲ ընկերության մասնագետները և իրավապահ մարմինները չեն կարողանում հստակ նշել՝ արդյո՞ք վթարը տեղի է ունեցել տեխնիկական պատճառներով, թե ադրբեջանական կողմի գործողությունների արդյունքում, պատճառն այն է, որ ադրբեջանական կողմը խոչընդոտում է և՛ Արցախի իրավապահների, և՛ գազամատակարարող ընկերության մասնագետների հասանելիությունը վթարի վայր։ Այս պահին վերականգնման աշխատանքները ևս չեն իրականացվում ադրբեջանական կողմից հարուցվող խոչընդոտների պատճառով»,- տարածած հաղորդագրության մեջ նշել է Արցախի ՄԻՊ Գեղամ Ստեփանյանը։
Factor.am-ի հետ զրույցում Արցախի պատկան մարմիններից մեկից մեզ հայտնեցին, որ այս պահի դրությամբ խնդրի լուծմանն ուղղված գործընթացում որևէ փոփոխություն չկա․ «Չգիտենք՝ խնդիրը երբ կլուծվի»,- ասաց մեր աղբյուրը, որը ցանկացավ անանուն մնալ։
Գազամատակարարման անջատմանը զուգահեռ՝ «Արցախէներգո» ՓԲԸ-ն հորդորում է հնարավորության սահմաններում խնայողաբար օգտվել էլեկտրաէներգիայից՝ ցանցի ծանրաբեռնվածությունից խուսափելու համար։
Ռոզա Վարդանյան
