06.08.2026 | 12:30
Ի՞նչ տարբերություն, թե երբ կհրապարակվի Սահամանադրության տեքստը․ Սրբուհի Գալյան. ՏԵՍԱՆՅՈՒԹ
Ինչու Փաշինյանի խոստացած 50 հազար դրամները չեն վճարվում 3 և ավելի երեխա ունեցող ընտանիքներին. ՏԵՍԱՆՅՈՒԹ
Քաղաքականություն
11.03.2022 | 20:09
Երեք և ավելի երեխա ունեցող ընտանիքներին պետությունը հունվար և փետրվար ամիսներին չի վճարել 50 հազար դրամ աջակցության գումարները: Այս մասին Factor TV-ին ահազանգում են մի քանի ընտանիքներ՝ նշելով, որ աջակցությունը ստանալու դիմումները ներկայացրել են հունվար-փետրվար ամիսներին, բայց Աշխատանքի և սոցիալական հարցերի նախարարությունից անորոշ պատասխաններ են տալիս: Մեզ դիմած քաղաքացիներն անանուն մնալու պայմանով փոխանցեցին, որ աջակցության ուշացումը հատկապես զգացվում է վերջին թանկացումների ֆոնին:
Երրորդ և մյուս երեխաների համար տրվող 50 հազար դրամի աջակցության մասին առաջին անգամ Նիկոլ Փաշինյանը խոսել էր 2021 թվականի արտահերթ ընտրությունների նախընտրական շրջանում՝ հրավիրելով երիտասարդ ընտանիքների ուշադրությունը: Վարչապետը նշել էր, որ գումարը վճարվելու է մինչև երեխայի 4 տարեկան դառնալը:
«Մենք երեխային պետական տուրք ենք տալիս, մեր շնորհակալությունն ենք հայտնում, որ ինքը ծնվել է, միացել է մեզ, որ մեր երկիրը շենացնի»,- հայտարարում էր Փաշինյանը։
Թե ինչու պետությունը հունվար, փետրվար և արդեն մարտ ամիսներին նորածին երեխաներին շնորհակալություն չի հայտնում, Աշխատանքի և սոցիալական հարցերի նախարարության թեժ գծի աշխատակցուհին Factor TV-ին հայտնեց, որ պատճառն այս ծրագրով գումարի հատկացումն է: Պետբյուջեից համապատասխան փոխանցումներ, ըստ նրա, չեն եղել:
Իսկ ահա Աշխատանքի և սոցիալական հարցերի նախարարության մամուլի խոսնակ Զառա Մանուչարյանը հավաստիացնում է՝ ֆինանսական միջոցների հատկացման հետ կապված խնդիրներ չկան: Նա ասում է, որ չի կարող մեկնաբանել, թե ինչու են նախարարության թեժ գծից ֆինանսական խնդիրները մատնանշել:
Նախարարության ներկայացուցչի վստահեցմամբ՝ հունվար և փետրվար ամիսների դիմումատուներին 50 հազարական դրամները կփոխանցվեն մարտի ընթացքում: Խոսնակի փոխանցմամբ՝ խոսքը 908 ընտանիքի տրվող փոխհատուցման մասին է:
Երեք և ավելի երեխա ունեցող ընտանիքներին 50 հազար դրամով աջակցելու այս որոշումը Կառավարությունն ընդունել է նախորդ տարվա դեկտեմբերին, որոշումն ուժի մեջ է մտել այս տարվա հունվարի 1-ից: Կառավարության նիստի ժամանակ աշխատանքի և սոցիալական հարցերի նախարար Նարեկ Մկրտչյանը հայտնել էր, որ որոշումն ընդունում են ժողովրդագրական իրավիճակը բարելավելու նպատակով:
2022 թվականի ամանորյա ուղերձում ևս Նիկոլ Փաշինյանն անդրադարձել էր պետական այս ծրագրին՝ շեշտելով, որ այդ որոշումն այս տարվա պետական նշանաբանի՝ վերածննդի տրամաբանության շրջանակում է իրականացվում:
Այնուհանդերձ, նշենք, որ Հայաստանում ծնունդների թիվը, անկախության առաջին տարիների համեմատ, նվազել է: Վիճակագրական կոմիտեի համաձայն՝ եթե, օրինակ, 1991 թվականին ծնվել է 78 հազար երեխա, ապա նախորդ տարի՝ 2021-ին ծնվել է 36․585 երեխա: Ծնունդների թիվը նախորդ տարվա մահերի ցուցանիշից ընդամենը 1900-ով է ավելի:
Մանրամասները՝ տեսանյութում։
Նարեկ Կիրակոսյան
