19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Քաղաքացիները ձեթ, ալյուր, շաքարավազ են պահեստավորում․խուճապն արդարացվա՞ծ է, թե անհիմն. ՏԵՍԱՆՅՈՒԹ
Տնտեսություն
11.03.2022 | 22:07
Որ սպառողական խուճապ իսկապես կա, տեսանելի էր նույնիսկ անզեն աչքով։ «Մալաթիա» տոնավաճառի հարակից տարածքում, որտեղ նաև մեծածախ վաճառք է իրականացվում, ամեն քայլափոխին ալյուրի, շաքարավազի ու ձեթի վաճառքի հարցն էր քննարկվում։
Կողք-կողքի գտնվող վաճառակետերում մեկն ասում էր՝ ապրանք չկա, եղածն արդեն վաճառել են, իսկ նոր խմբաքանակ չեն կարողանում բերել, որովհետև գործարանները չեն տալիս։ Մյուսն ասում էր՝ պակաս չկա և ցույց տալիս պահեստավորած ալյուրն ու շաքարավազը։ Բայց որ վերջին օրերին վաճառքի ծավալն իսկապես ավելացել է, ոչ ոք չէր հերքում։
Քաղաքացիներից շատերն էլ վստահ էին՝ խուճապն արհեստական է։
«Իրազեկ և պաշտպանված սպառող» ՀԿ նախագահ Բաբկեն Պիպոյանը հարց է բարձրացնում․ եթե քաղաքացին մեկ-երկու խանութում չի գտնում շաքարավազ կամ ալյուր, արդյո՞ք խուճապն արհեստական է։
Ինչ վերաբերում է գնաճին, այո՛, գնաճ կա և չի բացառվում, որ առաջիկայում է՛լ ավելի մեծ գնաճ կամ նույնիսկ պարենի դեֆիցիտ առաջանա, ասում է Բաբկեն Պիպոյանը։
Նկարահանման ընթացքում շրջեցինք նաև մեծ ու փոքր մի քանի խանութներում։ Գնաճ իսկապես կար, օրինակ՝ շաքարավազի գինը հասել էր 550 դրամի՝ նախկին 450-ի փոխարեն, ձեթի գինը՝ 1250-ի՝ նախկին 900-ի փոխարեն։ Որոշ խանութներում էլ նշեցին, որ ձեթը, մակարոնն ու շաքարավազն արդեն վերջացել է, պատվեր են տվել,՝ սպասում են, տեսնեն՝ կբերե՞ն, թե՞ ոչ։
Թանկացումներ, մեծ պահանջարկ ու դեֆիցիտ նաև Գյումրիում կա։ Գյումրու Անի թաղամասի փոքր խանութներից մեկի սեփականատերը Factor TV-ի հետ զրույցում նշել է, որ խանութներում առաջին անհրաժեշտության ապրանքների գները կտրուկ բարձրացել են, նկատելի է ձեթի և ալյուրի դեֆիցիտ։ Շաքարավազ կա, բայց այսօր ստացել են բարձր գնով։ Թե ինչ կլինի առաջիկայում, անորոշ է։
Մանրամասները՝ տեսանյութում։
Սաթենիկ Հայրապետյան
