Դատավոր Բորիս Բախշիյանի կալանավորման որոշման դեմ բողոքի քննությունը հետաձգվեց․ դատախազը նիստին չէր ներկայացել

Վերաքննիչ քրեական դատարանում՝ դատավոր Տիգրան Սիմոնյանի նախագահությամբ, այսօր հետաձգվեց Սյունիքի մարզի ընդհանուր իրավասության դատարանի դատավոր Բորիս Բախշիյանի կալանավորման որոշման դեմ բողոքի քննությունը՝ դատախազի բացակայության պատճառով։ Դատախազը գրությամբ դիմել էր դատարանին՝ նշելով, որ մասնակցում է Դատախազության կոլեգիայի նիստին և չի ստացել վերաքննիչ բողոքները, մինչդեռ պաշտպանության կողմը գտնում է՝ այդկերպ երևում է դատախազության վերաբերմունքը՝ Բորիս Բախշիյանի գործով։

«Ինչպես կարելի է կոլեգիայի նիստն ավելի բարձր գնահատել, քան՝ անձի ազատության իրավունքը և չներկայանալ կալանքի նիստին։ Մարտի 2-ին ծանուցվելով Վերաքննիչ դատարանում Բորիս Բախշիյանի կալանավորման հարցի վիճարկման գործի առկայության մասին, ինչո՞ւ գործը հսկող հարգարժան դատախազը ժամանակ չի տրամադրել բողոքին ծանոթանալու համար։ Մեկ զանգ էր անհրաժեշտ՝ կապվել կազմի հետ՝ խնդրելով սկանավորել բողոքը կամ դիմել մեզ»,- նշեց Սարդարյանը՝ պնդելով, որ այդ վարքագիծը ևս ցույց է տալիս, որ դատախազությունն ամեն գնով փորձում է կալանքի տակ պահել Բորիս Բախշիյանին։

Դատական հաջորդ նիստը նշանակվեց մարտի 14-ին՝ ժամը 15.00-ին։

Հիշեցնենք, որ Սյունիքի մարզի ընդհանուր իրավասության դատարանի դատավոր (լիազորությունները կասեցված են) Բորիս Բախշիյանի նկատմամբ քրեական հետապնդում է իրականացվում՝ Մանվել Փարամազյանի դեմ ցուցմունք տված Նիկոլ Փաշինյանի աջակցին կալանավորելու համար, թեև ամբաստանյալն ինքն էր դրսևորել ոչ պատշաճ վարքագիծ՝ չներկայանալով դատական նիստերին։ Ընդ որում՝ դատախազությունը չի բողոքարկել տվյալ որոշումը և առանց բողոքարկման՝ դատական
ակտը կայացնելուց ամիսներ անց դատավորի նկատմամբ քրեական հետապնդում է նախաձեռնել։ Դատավորին մեղադրանք է առաջադրվել ՀՀ քրեական օրենսգրքի 348-րդ հոդվածի 3-րդ մասով՝ անձին ապօրինի կալանավորելու հատկանիշներով, որն առաջացրել է ծանր հետևանք։ Քրեական գործի շրջանակներում ԱԱԾ-ն միջնորդություն է ներկայացրել դատարան՝ կալանավորումը որպես խափանման միջոց ընտրելու մասին, որը փետրվարի 7-ին դատավոր Դավիթ Արղամանյանի կողմից բավարարվել է։

Ռոզա Վարդանյան