09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Անթալիայի դիվանագիտական ֆորումի մասնակիցների ցուցակում Արարատ Միրզոյանի անունը դեռ չկա․ նրա մասնակցության մասին լուրը 2 օր առաջ է տարածվել
Քաղաքականություն
09.03.2022 | 16:41
Թուրքիայի նախագահ Ռեջեփ Ռեջեփ Էրդողանի հովանու ներքո կազմակերպվող Անթալիայի դիվանագիտական ֆորումի մասնակիցների ցանկը հայտնի է։ Այն հրապարակված է միջոցառման պաշտոնական կայքում։
Չնայած ՀՀ ԱԳ նախարարի մամուլի խոսնակ Վահան Հունանյանը երկու օր առաջ հայտարարել էր, որ Արարատ Միրզոյանը մասնակցելու է ֆորումին, նրա անունը մասնակիցների ցանկում դեռևս ներառված չէ։ Factor.am-ը փորձեց պատճառը պարզել նախարարի խոսնակից։
«Ինչպես արդեն իսկ հայտնել ենք, ՀՀ ԱԳ նախարար Արարատ Միրզոյանը մասնակցելու է Անթալիայի դիվանագիտական ֆորումին»,- մեր հարցին ի պատասխան՝ ասաց Վահան Հունանյանը։
Հիշեցնենք՝ Թուրքիայի ԱԳ նախարարի մամուլի քարտուղար Թանջա Բիլգիչը հայտարարել էր, որ Անկարան ողջունում է Անթալիայում կայանալիք դիվանագիտական ֆորումին ՀՀ ԱԳՆ ղեկավար Արարատ Միրզոյանի մասնակցության մասին որոշումը։
Նշենք, որ Անթալիայի դիվանագիտական ֆորումն անցկացվելու է մարտի 11-13-ը։ Ըստ պաշտոնական կայքի հաղորդագրության՝ ֆորումին ներկա կգտնվեն ավելի քան 2000 առաջնորդներ, դիվանագետներ, տարբեր ոլորտների ներկայացուցիչներ։ Մասնակիցների թվում են նաև Ադրբեջանի նախագահի արտաքին հարաբերությունների բաժնի ղեկավար Հիքմեթ Հաջիևը, Ադրբեջանի արտգործնախարար Ջեյհուն Բայրամովը, Իրանի արտգործնախարար Հոսեին Ամիր Աբդոլլահիանը, ՆԱՏՕ-ի գլխավոր քարտուղար Յենս Ստոլտենբերգը, ԵԱՀԿ գործող նախագահի անձնական ներկայացուցիչ Անջեյ Կասպրշիկը, Եվրոպական հանձնաժողովի հարևանության և ընդլայնման քաղաքականության հարցերի հանձնակատար Օլիվեր Վարհեին, ԵԱՀԿ Մինսկի խմբի ամերիկացի նախկին համանախագահ Մեթյու Բրայզան և այլք։
Պաշտոնական կայքում մասնակիցների թվում նաև նշվում է հայաստանցի վերլուծաբան, Տարածաշրջանային հետազոտությունների կենտրոնի ղեկավար Ռիչարդ Կիրակոսյանի անունը։
Թուրքական դիվանագիտական ֆորումին քննարկվելու են տարածաշրջանային և միջազգային հարցեր։
Հռիփսիմե Հովհաննիսյան
