07.10.2026 | 23:48
Արթուր Դանիելյանը կալանավորվեց
Ստոլտենբերգը նախազգուշացրել է ՌԴ-ին՝ չփորձել հարձակվել այն ուղիների վրա, որոնցով Ուկրաինան օգնություն է ստանում ՆԱՏՕ-ից
Քաղաքականություն
09.03.2022 | 14:37
ՆԱՏՕ-ի գլխավոր քարտուղար Յենս Ստոլտենբերգը նախազգուշացրել է Ռուսաստանին՝ չփորձել հարձակվել այն ուղիների վրա, որոնցով Ուկրաինան օգնություն է ստանում Դաշինքից։ Այս մասին հայտնում է CBC News-ը։
Ստոլտենբերգն ընդգծել է, որ Ռուսաստանի հարձակումը դաշնակից պետությունների մատակարարման ուղիների վրա, որոնք աջակցում են Կիևին զենքով և զինամթերքով, պատերազմի վտանգավոր սրացում կլինի:
«Դաշնակիցներն օգնում են Ուկրաինային՝ պաշտպանել իր ինքնապաշտպանության իրավունքը, որն ամրագրված է ՄԱԿ-ի կանոնադրությամբ։ Ռուսաստանն ագրեսոր է, իսկ Ուկրաինան պաշտպանում է իրեն, եթե հարձակում լինի ՆԱՏՕ-ի որևէ երկրի, ՆԱՏՕ-ի տարածքի վրա, դա կբերի 5-րդ հոդվածի կիրառմանը»,- ասել է Ստոլտենբերգը։
Նշենք, որ 5-րդ հոդվածը ՆԱՏՕ-ի հիմնադիր պայմանագրի ինքնապաշտպանության դրույթն է, որտեղ ասվում է, որ մեկ անդամի վրա հարձակումը նշանակում է հարձակում բոլոր 30 անդամ երկրների վրա:
Լրատվականը նշում է, որ ԱՄՆ հետախուզական համայնքից ոմանք վախենում են, որ Մոսկվան կարող է փորձել դադարեցնել զենքի մատակարարումը դեպի Ուկրաինա՝ կա՛մ ավիահարվածներով, կա՛մ հեռահար հրետանու միջոցով: Արևմուտքից եկող զենքը նախ բեռնաթափվում է սահմանամերձ երկրներում, ինչպես, օրինակ, Լեհաստանում, ապա առաքվում Ուկրաինա ցամաքային ճանապարհով, ասվում է հրապարակման մեջ։
Տաթև Ֆռանգյան
