10.09.2026 | 19:43
Արմաշի նախկին զորանոցի տարածքը հետ են վերցնում Ջրային կոմիտեից․ «Արարատ» ՋՕԸ-ն այն չի օգտագործել
Արցախում գազատարի պայթեցումն Ադրբեջանի կողմից տնտեսական գրոհի արդյունք էր. Տիգրան Աբրահամյան․ ՏԵՍԱՆՅՈՒԹ
Քաղաքականություն
09.03.2022 | 12:04
«Հատկապես վերջին 10 օրերին շփման գծի տարբեր ուղղություններով և՛ Արցախի, և՛ Հայաստանի, Ադրբեջանը դիմում է տարբեր բնույթի սադրանքների: Մեծ է հավանականությունը, որ Հայաստանից Արցախ մուտք գործող գազատարի պայթյունը տեղի է ունեցել Ադրբեջանի նախաձեռնությամբ»,- այսօր ԱԺ-ում լրագրողների հետ զրույցում այս մասին նշեց «Պատիվ ունեմ» խմբակցության պատգամավոր Տիգրան Աբրահամյանը:
Նա նշեց, որ կան որոշակի մտահոգություններ ու վարկածներ. «Ադրբեջանը թույլ չի տալիս տեղում վերականգնողական աշխատանքներ իրականացնել, նաև տեղում որոշակի իրավապահ մարմինների գործառույթների շրջանակներում աշխատանքներ իրականացնել ու դեռևս վերջնական եզրահանգում չկա: Բայց մեծ է հավանականությունը, որ Ադրբեջանն է արել, քանի որ գազատարի վերահսկողությունը ադրբեջանական զորքերի հատվածում է ու այդ ահաբեկչական գործողությունը կարող էին նրանք անել»:
«Վերջին մեկ շաբաթվա ընթացքում ՀՀ սահմանագծի Երասխի հատվածում ունեցել ենք ադրբեջանական կողմից իրականացված ագրեսիա, որի արդյունքում ունենք մեկ զոհ, մեկ վիրավոր Ասկերանի շրջանի Խրամորթ գյուղի, ինչպես նաև Մարտունու շրջանի Նոր Շեն հատվածում։ Թաղավարդ գյուղի հատվածում Ադրբեջանը դրսևորում է տարբեր բնույթի սադրանքներ, որոնք սկսվում են հրաձգային նետերից արձակված կրակահերթերով, փոքր հրետանու ականանանետի կիրառմամբ, ինչպես նաև հոգեբանական գրոհի իրականացմամբ, որը արտահայտվում է բարձրախոսների միջոցով հայկական բնակավայրերի ուղղությամբ մուղամների և նաև զգուշացնող հայտարարությունների տարածումով:
Այդ հայտարարությունների հիմքում դրված է հետևյալ միտքը, որ դուք պետք է հեռանաք այս հատվածներից, որովհետև սրանք մեր հողերն են, թե չէ հակառակ դեպքում վաղ թե ուշ մենք դա անելու ենք ուժի կիրառման միջոցով: Ընդ որում, բարձրախոսներից բացի՝ ադրբեջանցի զինվորները տարբեր ուղղություններով գոռում են, որ մենք վաղ թե ուշ մտնելու ենք և բոլորիդ կոտորելու ենք:
Այսինքն՝ կա հստակ Ադրբեջանի կողմից իրականացնող համակարգային գրոհ առաջին հերթին Արցախի ուղղությամբ, որը ստանում է գրոհի տարբեր բնույթներ՝ ռազմականից մինչև հոգեբանական, նաև տնտեսական, որն արտահայտվում է գազատարի պայթյունով: Եվ այս ամենի մասին ՀՀ իշխանությունների կողմից որևէ արձագանք չի եղել»,- նշեց Աբրահամյանը:
Մանրամասները՝ տեսանյութում:
