Թուրքիայի ընդդիմության վարկանիշն ավելի բարձր է, քան Էրդողանի գլխավորած դաշինքինը

Թուրքիայի ընդդիմադիր կուսակցությունների նախընտրական դաշինքը՝ գլխավոր ընդդիմադիր Ժողովրդահանրապետական կուսակցության (CHP) գլխավորությամբ, կարող է ստանալ ձայների ավելի մեծ բաժին, քան Արդարություն և զարգացում կուսակցության (ԱԶԿ) և Ազգայնական շարժում կուսակցության իշխող դաշինք: Այս մասին է վկայում Metropoll ընկերության նոր հետազոտությունը, գրում է Ահվալ գործակալությունը։ 

Հետազոտության մասնակիցները պատասխանելով հարցին, թե ում օգտին կքվեարկեին, եթե ընտրությունները կայանային հաջորդ կիրակի՝ 27,1 տոկոսն ընտրել է CHP-ին: Նրա դաշնակից աջ կենտրոնամետ Լավ կուսակցությունն էլ ստացել է 13,1 տոկոս՝ ընդհանուր ձայների թիվը հասցնելով 40,2 տոկոսի։

Պահպանողական Երջանկություն կուսակցությունը, որն ունի նույն քաղաքական ավանդույթները, ինչ ԱԶԿ-ն, հավաքել է ձայների 2,6 տոկոսը,  Ալի Բաբաջանի  «Ժողովրդավարություն և առաջադիմություն» կուսակցությունը (DEVA)՝ 2,9 տոկոսը: Երկու կուսակցություններն էլ, ինչպես նաև նախկին վարչապետ Ահմեթ Դավութօղլուի Ապագա կուսակցությունը 2023թ-ի ընտրություններում կլինեն մի դաշինքի մաս։ 

Պահպանողական փոքր կուսակցությունների ավելացումը ընդդիմադիր «Ազգային դաշինքի» ձայները դարձնում է  45 տոկոսից ավելի, քան ԱԶԿ-ի Ժողովրդական դաշինքինը,  որի համաձայն ԱԶԿ-ն և MHP-ն կշահեն համապատասխանաբար 32,2 և 7 տոկոսը: Սակայն այժմ դաշինքներից որևէ մեկը բավարար ձայն չունի Թուրքիայի գործող համակարգով նախագահ ընտրելու համար,  անհրաժեշտ է  50 տոկոս գումարած մեկ ձայն։ Եվ այս համակարգը քրդերի ձայներն է  վճռորոշ դարձնում։ Թուրքիայում քրդերի ձայնը հիմնականում բաշխված է ԱԶԿ-ի և Ժողովուրդների դեմոկրատական կուսակցության (HDP) միջև։

HDP-ն հիմա հավաքում է ձայների 12,6 տոկոսը և աջակցել  է ժամանակին «Ժողովուրդների դաշինքի» թեկնածուներին՝ 2019 թվականի տեղական ընտրություններում ԱԶԿ-ի քաղաքապետերին Թուրքիայի խոշոր նահանգներում հաղթելու համար, սակայն, հիմա կուսակցությունը դուրս է մնում դաշինքից։

Էմմա Չոբանյան