Թևակոխել ենք բարեփոխումների ժամանակաշրջան․ Սուրեն Պապիկյանը՝ ԳՇ-ում փոփոխությունների մասին․ ՏԵՍԱՆՅՈՒԹ

Ինչո՞վ է պայմանավորված Գլխավոր շտաբի պետի, պետի տեղակալի ու վարչության պետերի փոփոխությունները: Ազգային ժողովում կառավարության հետ հարցուպատասխանի ժամանակ պաշտպանության նախարար Սուրեն Պապիկյանին այս հարցն ուղղեց «Պատիվ ունեմ» խմբակցության պատգամավոր Տիգրան Աբրահամյանը:

«Ի՞նչ նպատակ է սա հետապնդում, չե՞ք կարծում, որ Եվրասիական տարածաշրջանում ստեղծված իրավիճակում ԳՇ-ում այդքան մեծ փոփոխությունները շատ ավելի են մեծացնում այն սպառնալիքները, որոնք փոխանցվում են նաև մեր տարածաշրջանին», – հետաքրքրվեց պատգամավորը:

Սուրեն Պապիկյանը հայտարարեց, որ եթե հետևեն տարածաշրջանում ու աշխարհում տեղի ունեցող իրադարձություններին ու փոփոխություններին ու միայն առաջնորդվեն ըստ այդմ, հնարավոր է՝ որևէ փոփոխություն ընդհանրապես չանեն:

«Վերջին մի քանի տարիներին զարգացումների ընթացքն այնպիսին է, որ տեղի են ունենում իրադարձություններ, որը վաղօրոք հնարավոր չէ կանխորոշել, բայց, միևնույն ժամանակ, բարեփոխումները անհրաժեշտ են ու ուշանում են:

Ու մենք այսօր չենք կարող հապաղել, իրավունք չունենք հապաղելու: Մենք թևակոխել ենք շատ կարևոր բարեփոխումների ժամանակաշրջան, վստահ եմ՝ վաղուց ժամանակն է, որ նաև պաշտպանական գերատեսչությունում պիտի վստահել, պիտի հնարավորություն տալ պատերազմի բովով անցած մեր բազմաթիվ ունակ ու երիտասարդ կադրերին, ես չեմ ուզում սա կապել անձերի հետ, բայց, միևնույն ժամանակ, չեմ կարող չասել, որ ամեն ինչ կախված է անձերից»,- նշեց Պապիկյանը:

Նրա հավաստմամբ՝ ՊՆ-ում բոլոր կադրերն իրենց տեղում են, ժամանակավոր պաշտոնակատարի ինստիտուտն էլ իրավական բոլոր հիմքերը տալիս է նրան ընդունել որոշումներ, կատարել ցուցումներ ու հրամաններ:

«Կարծում եմ՝ որևէ վտանգ մենք սրանով չենք բերել ու չենք պատրաստվում բերել, ավելին, ամեն ինչ միտված է նրան, որ օր առաջ ունենանք ավելի մոտիվացված հրամկազմ ու սա ազդակ է պաշտպանական գերատեսչության ենթակայության տակ գտնվող բոլոր սպաներին. բոլոր արժանավոր սպաները հնարավորություն են ունենալու զբաղեցնել բարձր պաշտոններ՝ անկախ նրանց բարեկամ, ծանոթ ու այլ կապերից»,- նշեց պաշտպանության նախարարը:

Տիգրան Աբրահամյանն արձագանքեց՝ նկատելով, որ պատերազմի հետևանքով կան վիրավորված սպաներ, որոնք այս պահին շարունակում են մնալ կադրային ռեզերվում:

Պապիկյանը վստահեցրեց, որ բոլոր արժանի մարդիկ հնարավորինս օբյեկտիվ կերպով կզբաղեցնեն իրենց արժանի տեղը:

Մանրամասները՝ տեսանյութում: