Հասարակություն
01.03.2022 | 22:06Դավթյանների ընտանիքում կրկին առաջին քայլի, հետո՝ առաջին խոսքի բերկրանքն են վայելելու 22 տարի անց։ 44-օրյա պատերազմում զոհված Գարիկ Դավթյանի եղբայրը՝ Գարիկն է ծնվել։
Փոքրիկ Գարիկը փետրվարի 20-ին է ծնվել, 60-ն անց ծնողների հույզերն ու զգացողությունները աննկարագրելի են։ Նույն զգացողությունները նաև բուժանձնակազմին են փոխանցվել։
Փոքրիկին բոլոր բարեկամներն ու ծանոթներն էին սրտի թրթիռով սպասում։ Երջանկությունը դեռ թույլ չի տալիս դժվարությունների մասին խոսել, բայց օգնողները շատ են, արդեն հերթագրվել են՝ կես-կատակ, կես-լուրջ ասում է մայրը՝ տիկին Գոհարը։
Տանն ամեն ինչ արդեն պատրաստ՝ Գարիկին են սպասում, երկու օրից փոքրիկը տուն կգնա՝ իր հետ նոր հույս ու կյանք տանելով։
Դավթյանների ընտանիքում 3 անգամ է մանկան ճիչ լսվել, բայց ծնողները երկուսին էլ կորցրել են։ Երեխաներից մեկին 2 տարեկանում են կորցրել, մյուսին՝ Գարիկին, 44-օրյա պատերազմի ժամանակ։ 22-ամյա Գարիկը պայմանագրային զինծառայող էր։ Հադրութում էր ծառայում։
Ծնողները վստահ են՝ մեծ եղբոր հայրենասիրությունը փոքրիկին է անցել։
Մանրամասները՝ տեսանյութում։
Սաթենիկ Հայրապետյան
