Ռուսները պատրաստ են գնալ «մինչև վերջ»․ սա գոյապայքար է՝ ասում է Զելենսկին. ՏԵՍԱՆՅՈՒԹ

Ավելի քան 10 մարդ է զոհվել, ևս 35-ը` վիրավորվել Ուկրաինայի մեծությամբ երկրորդ քաղաք Խարկովում ռուսական հրթիռային հարվածների հետևանքով։ Այս մասին հայտնում է Ուկրաինայի ՆԳ նախարարի խորհրդական Անտոն Գերաշչենկոյին։

«Ազատության հրապարակը խոցվել է թևավոր հրթիռով. նմանատիպ հրթիռով ևս մեկ հարված է եղել փրկարարների ժամանելուց հետո, այն ևս դիպել է շենքին։ Շրջխորhրդի շենքի 1/3-ը փլուզվել է»,- նշել է Գերաշչենկոն։

Վլադիմիր Զելենսկին այս գործողությունը որակել է «անթաքույց ահաբեկչություն»։

Սրան զուգահեռ՝ ՌԴ պաշտպանության նախարար Սերգեյ Շոյգուն հայտարարել է, որ Ուկրաինայում ռուսական բանակը ռազմական գործողությունները կշարունակի՝ մինչև, իր ձևակերպմամբ, «առաջադրված նպատակներին հասնելը»։ Ըստ նախարարի՝ Ուկրաինայում ռազմական գործողությունների գլխավոր խնդիրը Ռուսաստանն Արևմուտքի ռազմական սպառնալիքից պաշտպանելն է։

Իսկ Ուկրաինայի նախագահ Վլադիմիր Զելենսկին դիվանագետների կողմից բուռն ծափահարությունների է արժանացել Եվրախորհրդարանում տեսակապով ելույթի ժամանակ՝ ներկաներին հայտարարելով, որ իր երկիրը «կռվում է գոյատևման համար»։

Ժնևում Զինաթափման հարցերով ՄԱԿ-ի կոնֆերանսին Ռուսաստանի արտգործնախարար Սերգեյ Լավրովի՝ տեսակապով ելույթի ժամանակ եվրոպական և մի շարք այլ երկրների ներկայացուցիչներ լքել են դահլիճը։ Լավրովը հայտարարել է, որ անձամբ չի մասնակցում ՄԱԿ-ի կոնֆերանսին, իր բնորոշմամբ՝ Ռուսաստանի դեմ «վրդովեցուցիչ» պատժամիջոցների պատճառով։

«Ցանկանում եմ ընդգծել, որ Ռուսաստանը չի ունեցել և չունի ցամաքային միջին և փոքր հեռահարության հրթիռներ, հակառակը պնդել՝ նշանակում է դիտավորյալ կեղծ պատկեր ստեղծել, կոծկել իրական մեղավորների գործողությունները, որոնք իրապես մեղավոր են Միջին և փոքր հեռահարության հրթիռների մասին պայմանագրի ոչնչացման համար»,- հայտարարել է ՌԴ ԱԳ նախարար Սերգեյ Լավրովը։

Մանրամասները՝ տեսանյութում։

Ռոզա Վարդանյան