ՌԴ-ի լկտի սուտն է․ ռմբակոծո՛ւմ է խաղաղ բնակչությանը՝ զոհվում են, արյունահոսում․ Ուկրաինայի Հայերի միության ներկայացուցիչ. ՏԵՍԱՆՅՈՒԹ

Factor TV-ի հարցազրույցը Ուկրաինայի Հայերի միության ներկայացուցիչ Ռուբեն Մակարյանի հետ

-Պարո՛ն Մակարյան, պատերազմի վեցերորդ օրն է։ Ի՞նչ է կատարվում Կիևում, ուր Դուք այս պահին գտնվում եք։ Հրթիռային հարվածները շարունակվո՞ւմ են, կարո՞ղ եք դուրս գալ փողոց։

-Կիևում ակտիվ ռազմական գործողություններ են ընթանում, Կիևը հրթիռակոծվում է ՌԴ-ի կողմից, բոլոր կողմերից ենթարկվում է ինտենսիվ ռմբակոծման։ Անընդհատ լսվում են օդային տագնապի ազդանշաններ։ Պաշտոնական մարմինները մարդկանց զգուշացնում են իջնել ապաստարաններ, իրավիճակը շատ ծանր է, որովհետև պարետային ժամ է գործում, խանութներում հսկայական հերթեր են սննդամթերքի, խմելու ջրի, դեղորայքի համար։ Մարդկանց մի մասը լքում է քաղաքը, բայց շատերը վախենում են հեռանալ, որովհետև շատ վտանգավոր են դարձել այն ուղիները, որոնցով կարելի է հեռանալ արևմտյան կողմ։

-Ռուսաստանի զինվորական և քաղաքական պաշտոնյաները պնդում են, որ չեն սպառնում Ուկրաինայի խաղաղ բնակչությանը, հակառակը՝ սադրանքների մեջ մեղադրում են ուկրաինացի զինվորականներին։ Ի՞նչ տեղեկություններ կհայտնեք այս մասով, կա՞ միտումնավոր թիրախավորում խաղաղ բնակչության։

-Իհարկե՝ սուտ է, որ չեն թիրախավորում բնակչությանը, դա լկտի սուտ է։ Ես կխնդրեի հայ հեռուստադիտողին, որ չհավատան այդ ստերին։ Մենք այդ ամենի միջով անցել ենք, և Հայաստանը գիտի՝ դա ինչ է։ Ես ապաքաղաքական մարդ եմ, հասարակական գործիչ եմ, բայց հիմա կոնկրետ ռմբակոծություններ են։ Խարկով քաղաքը ռմբակոծվել է այնքան, որ բնակչությանը մինչև հիմա չեն հանել վերջնականապես։ Դոնեցկի մարզի քաղաքներից մեկն ամբողջությամբ ավերված է, և չեմ կարող ասել՝ ինչպես են վերականգնելու։ Մինչև հիմա բնակչությունը նկուղներում է՝ արյունահոսում են, զոհված են։ Ես մինչև առավոտ պատասխանել եմ հեռախոսազանգերի, մարդիկ խնդրում են՝ հնարավորություն տրվի հումանիտար միջանցք բացել, մարդիկ դուրս գան շրջափակման մեջ գտնվող քաղաքներից՝ Մարիուպոլ, Մերիտոպոլ, Բերդիանսկ՝ այն քաղաքներում, որտեղ արդեն ռուսներն են գտնվում։ Ինչի՞ մասին է խոսքը, խաղաղ բնակչությանն անմիջապես թիրախավորում են։

Հարցազրույցն ամբողջությամբ՝ տեսանյութում։

Ռոբերտ Անանյան