Ի՞նչ վիճակում է Սամվել Կարապետյանի, Ռուբեն Վարդանյանի ունեցվածքը․ ՌԴ հարուստները կորուստներ են կրում․ ՏԵՍԱՆՅՈՒԹ

Ուկրաինայում պատերազմի առաջին օրվա ընթացքում, դեռ պատժամիջոցները չսկսված, Ռուսաստանի ամենահարուստ մարդիկ միասին կորցրել են շուրջ 39 միլիարդ դոլար։ Սա մի թիվ է, որը 10 անգամ գերազանցում է Հայաստանի այս տարվա բյուջեն։

Forbes-ի հաշվարկով՝ ամենամեծ կորուստն ունեցել է Վագիթ Ալեքպերովը։ Ռուսական նավթարդյունաբերական հսկայի՝ Lukoil-ի բաժնետոմսերի անկման պայմաններում դրա համասեփականատեր Ալեքպերովը մեկ օրում կորցրել է 5,4 մլրդ դոլար։

Երկրորդ տեղում են ռուսական գազարդյունահանող Novatek ընկերության երկու համասեփականատերեր, որոնցից Գենադի Տիմչենկոն օրերս հայտնվել էր նաև բրիտանական պատժամիջոցների տակ․ նա կորցրել է 3,9 մլրդ դոլար, իսկ գործընկերը՝ Լեոնիդ Միխելսոնը՝ 4 մլրդ դոլար։

Ռուսաստանում գործունեություն ծավալող հայ գործարար Սամվել Կարապետյանը, ըստ Forbes-ի, ոչ մի կորուստ չի ունեցել։ Նրա ունեցվածքը կազմում է շուրջ 3,7 միլիարդ դոլար։

Ռուսաստանցի հայ միլիարդատերերից Ռուբեն Վարդանյանի կորուստը, ըստ Forbes-ի, կազմել է ընդամենը 3 մլն դոլար։ Նրա կարողությունը գնահատվում է շուրջ 1,3 մլրդ դոլար։

Forbes-ի ամենահարուստ մարդկանց ցուցակում է նաև Ռուսաստանում առևտրով զբաղվող Արտյոմ Խաչատրյանը։ Նա կորցրել է ավելի քան 700 մլն դոլար՝ ունեցվածքի մեկ երրորդը։

Հայկական արմատներ ունեցող մեկ այլ ռուսաստանցի միլիարդատեր Սերգեյ Գալիցկին կորցրել է 36 մլն դոլար։ Նրա 3,4 մլրդ դոլար կարողության վրա դա մեծ ազդեցություն չի ունենա։

«Գեոպրոմայնինգ» ընկերության ղեկավար Ռոման Տրոցենկոյի կարողությունը նույնպես փոփոխություն չի կրել։ Տրոցենկոն, հիշեցնենք, նախորդ տարի բաժնեմաս գնեց «Զանգեզուրի պղնձամոլիբդենային կոմբինատում», որն ավանդաբար Հայաստանի խոշորագույն հարկատուներից է։

Մանրամասները՝ տեսանյութում։

Գարիկ Հարությունյան