15.05.2026 | 09:32
Նավթի գներն աճել են
ՀՀ-ի դիրքորոշումը պետք է հստակ լինի, որ ինքը Արևմուտք-Ռուսաստան հակամարտությունում կողմ չէ․ ՏԵՍԱՆՅՈՒԹ
Քաղաքականություն
24.02.2022 | 13:22
Ուկրաինայի շուրջ ստեղծված իրավիճակն արտառոց է և աննախադեպ, իսկ դա նշանակում է, որ մի քանի անգամ ավելի զգույշ պետք է լինել։ «Ժողովրդավարության և անվտանգության հարցերի հայկական կենտրոնի» կազմակերպած «Ուկրաինական ճգնաժամ․ ինչպե՞ս պետք է դիրքավորվի Հայաստանը» թեմայով քննարկմանն անդրադառնալով Ռուսաստանի կողմից այսօր Ուկրիանայի վրա հարձակման փաստին՝ ասաց քաղաքագետ Էդգար Վարդանյանը։
«Մեզ համար քիչ խոսելն ամենաօպտիմալ տարբերակն է, բայց կարծում եմ, որ հստակ պետք է լինի Հայաստանի դիրքորոշումն այն առումով, որ ինքը Արևմուտք-Ռուսաստան հակամարտությունում կողմ չէ, թեև քաղաքակրթական առումով, ինչպես ՀՀ իշխանություններն էլ բազմիցս նշել են՝ Հայաստանն արևմտյան աշխարհի մաս է կազմում և կիսում է այստեղի արժեհամակարգը, ժողովրդական արժեքները։ Դրա համար ՀՀ-ի դիրքորոշումը նվազագույնը չպետք է հակասի ՄԱԿ-ի գլխավոր քարտուղարի դիրքորոշումներին»,- ասաց նա։
Քաղաքագետի խոսքով՝ շատ մեծ դեր ունի այս իրավիճակում ինֆորմացիոն անվտանգությունը։ Նա նկատեց՝ այս խնդրին պետք է հավելյալ ուշադրություն դարձնեն քաղաքացիական հասարակությունը, ընդդիմությունը։
«Մենք տեսնում ենք, որ կոնֆլիկտի առաջին փուլը ինֆորմացիոն դաշտում է տեղի ունենում, տարիներ շարունակ տարված հակաժողովրդավարական քարոզչությունն է այս ամենի հիմքը»,- նշեց Էդգար Վարդանյանը։
Մանրամասները՝ տեսանյութում։
