29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
2 ամսից՝ նոր տանիք գտնելու խնդրի առաջ․ անօթևանների առօրյան Երևանի թիվ 1 տուն-ինտերնատում․ ՏԵՍԱՆՅՈՒԹ
Հասարակություն
21.02.2022 | 19:34
Արդեն 1 ամսից ավելի է՝ Վարդաշենի անօթևանների կացարանի բնակիչները տեղավորվել են Երևանի թիվ 1 տուն-ինտերնատում։
Հունվարի 7-ին, երբ Աշխատանքի և սոցիալական հարցերի նախարարության որոշմամբ անօթևաններն այստեղ տեղավորվեցին, դժգոհությունները շատ էին։ Մեծ մասը չէր ուզում, ասում էին՝ Վարդաշենում հարմարվել են։ Հարմարվե՞լ են, ի վերջո, նոր պայմաններին, թե՞ էլի դժգոհություններ ունեն։ Այս հարցի պատասխանն էինք փնտրում։
Բնակիչներից տիկին Ալգան հին հագուստները քանդում, թելերով գուլպաներ է գործում, երբեմն նաև վաճառում դրանք, իսկ գումարով դեղեր է գնում։ Հարևանուհին՝ Մարգարիտա Բաղդասարյանն էլ առողջական խնդիրներ ունի, աշխատել չի կարող։
Այստեղ տեղափոխվելուց հետո դժգոհության պատճառներից մեկն էլ սանհանգույցի բացակայությունն էր։ Հիմա այդ հարցը լուծվել է։ 2-րդ հարկի սանհանգույցն արդեն պատրաստ է, իսկ առաջին հարկում դեռ վերանորոգման աշխատանքներ են։
Կացարանի բնակիչների համար առնվազն 4 օրը մեկ լողանալը պարտադիր է, ասում է անօթևանների ծրագրի ղեկավար Հարություն Մուրադյանը, եթե ավելի հաճախ են ուզում լողանալ, շատ ավելի լավ։
Նկարահանվելուց չխուսափող բնակիչներից դժգոհություն չլսեցինք, կարծես թե արդեն հարմարվել են։
Խմիչքն ու խմելու ցանկությունն այստեղ տեղափոխված մի քանի անօթևանների ու ղեկավարության միջև տարաձայնությունների հիմնական պատճառներից է եղել։ Հիմա արդեն գիտեն, որ ալկոհոլը խստիվ արգելվում է։
Այստեղ տեղափոխված անօթևանները ստանում են հիգիենայի պարագաներ, օրական երկու անգամ սնունդ։ Ըստ պայմանագրի՝ նրանք այստեղ կմնան 3 ամիս, որից հետո պետք է ազատեն տարածքը։
Հարցի՝ իսկ եթե աշխատանք չգտնե՞ն, տուն-ինտերնատի տնօրեն Կոլյա Մակարյանը պատասխանում է, որ դրսում հաստատ չեն թողնի, մի լուծում կգտնեն։
Տուն ինտերնատում այսօր 73 անօթևան է բնակվում։ Այստեղ հունվարի 7-ին ընդունվելուց հետո նրանց թիվը պակասել է 4-ով։ Մեկն ընտանիքի հետ է վերամիավորվել, մյուսները պարզապես հեռացել են։
Մանրամասները՝ տեսանյութում։
Սաթենիկ Հայրապետյան
