Ձեզնից փորձում են գումար շորթել․ «ՀայՓոստն» ահազանգում է համացանցում գրանցվող նոր դեպքերի մասին․ ՏԵՍԱՆՅՈՒԹ

Համացանցում դարձյալ ավելացել են շորթման դեպքերը։ Անհայտ անձինք, օգտագործելով անվճար հայտարարությունների տարբեր էջեր, ինչպես List.am-ը, նամակների ուղարկման տարբեր հարթակներ, փորձում են հասանելիություն ստանալ այլոց անձնական բանկային տվյալներին: Այս մասին նախազգուշացնող հայտարարություն է տարածել «ՀայՓոստ» փակ բաժնետիրական ընկերությունը:

«ՀայՓոստ»-ն ահազանգեր է ստանում, որ ի թիվս հայտնի այլ ընկերությունների՝ իրենց ընկերության անվան և ապրանքային նշանի շահարկմամբ ևս մարդկանցից բանկային տվյալների կորզման փորձեր են արվում:

Ընկերությունը տեղեկացնում է, որ իրենք օգտատերերի ստացած տարատեսակ հաղորդագրությունների հետ որևէ առնչություն չունեն․ «Հորդորում ենք ձեռնպահ մնալ առցանց հարթակներում գրանցած էջերի ծածկագրերը, հեռախոսահամարները, անձնագրերի համարները և այլ անձնական տվյալներն անծանոթ անձանց տրամադրելու առաջարկներն ընդունելուց, ոչ մի դեպքում չտրամադրել բանկային տվյալներ և օգտվել բացառապես պաշտոնական աղբյուրներից»։

Տեղեկատվական անվտանգության փորձագետ Սամվել Մարտիրոսյանն ասում է՝ այս խնդրի դեմ պայքարի տեխնիկական տարբերակներ չկան և ընդգծում՝ պարզապես պետք է ուշադիր լինել․ «Մարդիկ անուշադիր են, և իրենց տվյալները լրացնում, նվիրում են հանցագործներին»։

«ՀայՓոստ»-ի անվան տակ անցկացվող ֆիշինգային հարձակման մասին բարձրաձայնել էր նաև տեղեկատվական անվտանգության փորձագետ Արթուր Պապյանը՝ ուսումնասիրելով երեք նամակ, որոնք ուղարկված են եղել Yahoo Mail-ի օգտատերերին։

Մանրամասները՝ տեսանյութում։

Արփի Հակոբյան