Մոսկվան արդեն ընտրել է թիրախները․ Բլինքեն

ԱՄՆ պետքարտուղար Էնթոնի Բլինքենը հայտարարել է, որ Ռուսաստանը հիմք է ստեղծում պատերազմ սկսելն արդարացնելու և առաջիկա օրերին Ուկրաինայի վրա հարձակում սկսելու համար։ Այս մասին Բլինքենը հայտարարել է ՄԱԿ-ի Անվտանգության խորհրդի նիստում՝ կոչ անելով Մոսկվային փոխել իր քաղաքականությունը, գրում է CNN-ը:

Բլինքենը փոխել է իր այցերի ժամանակացույցը, որպեսզի կարողանա ելույթ ունենալ ՄԱԿ-ի Անվտանգության խորհրդի նիստում։ Ամերիկացի բարձրաստիճան պաշտոնյան ասել է, որ ինքը ներկայացնում է ԱՄՆ հետախուզության տվյալները, որոնց համաձայն Ռուսաստանը ներխուժման համար պատրվակներ է հորինում, իսկ  Արևմուտքը փորձում է «ազդել Ռուսաստանի վրա, որպեսզի նա հրաժարվի պատերազմի ուղուց և ընտրի այլ ճանապարհ, քանի դեռ ժամանակ կա»:

«Այսօր ես այստեղ եմ, որպեսզի ոչ թե պատերազմ սկսեմ, այլ կանխեմ այն»,- ասել է Բլինքենը։

ԱՄՆ-ն հայտարարել է, որ Ուկրաինայի սահմանին առկա ապացույցները ցույց են տալիս, որ Ռուսաստանը «շարժվում է դեպի մոտալուտ ներխուժում» և զորքերը դուրս չի բերում՝ չնայած Մոսկվայի հավաստիացումներին: «Բոլոր նշանները ցույց են տալիս, որ նրանք պատրաստ են մտնել Ուկրաինա, հարձակվել Ուկրաինայի վրա», – հինգշաբթի օրը Սպիտակ տնից հեռանալիս լրագրողներին ասել է Բայդենը:

Ռուսաստանը հերթական անգամ հերքել է այս մեղադրանքները, թե պատրաստվում է հարձակվել Ուկրաինայի վրա՝ դրանք որակելով «անհիմն»։

Անվտանգության խորհրդին ուղղված իր ուղերձում Բլինքենը ներկայացրել է մի քանի քայլեր, որոնք ԱՄՆ-ն ակնկալում է, որ Ռուսաստանը կձեռնարկի առաջիկա օրերին՝ փորձելով արդարացնել ռազմական գործողությունները Ուկրաինայում: Նա հայտարարել է, որ Մոսկվան, ամենայն հավանականությամբ, կփորձի պատերազմի համար պատրվակ ստեղծել, որը կարող է լինել հորինված ահաբեկչական գործողությունը Ռուսաստանի ներսում, կամ ասենք, զանգվածային գերեզմանի, իբր, հայտնաբերումը կամ անօդաչու թռչող սարքի կազմակերպված հարվածը:

«Ռուսաստանը կարող է այս իրադարձությունը բնութագրել որպես էթնիկ զտում կամ ցեղասպանություն՝ ծաղրելով մի հայեցակարգ, որը մենք այս պալատում անլուրջ չենք ընդունում», – ասել է Բլինքենը:

Բլինքենը նաև հայտարարել է, որ Ռուսաստանի բարձրաստիճան պաշտոնյաները, ամենայն հավանականությամբ, հրատապ հանդիպումներ կանցկացնեն նախքան հարձակումը, որը կուղեկցվի նաև կիբերհարձակումներով։ Բլինքենը նաև ասել է, որ ԱՄՆ-ը կարծում է, որ Մոսկվան արդեն ընտրել է այն թիրախները, որոնց ուղղությամբ ռուսական տանկերն ու զորքերը կշարժվեն, այդ թվում՝ Ուկրաինայի մայրաքաղաք Կիևը:

Տաթև Ֆռանգյան