16.01.2025 | 20:13
Մեծ Բրիտանիան և Ուկրաինան 100-ամյա գործընկերության համաձայնագիր են ստորագրել
Ուզո՞ւմ ես բուժվել, տո՛ւր անձնական տվյալներդ. ԲԿ-ն հրաժարվել է սպասարկել․ ահազանգ քաղաքացուց. ՏԵՍԱՆՅՈՒԹ
17.02.2022 | 20:50
Պատշաճ բժշկական ծառայություններ մատուցելու նպատակով՝ բնակչության պետական ռեգիստրից անսահմանափակ քանակով հարցում անելու և ցանկացած անձնական տվյալներ ստանալու, դրանք 10 տարով պահպանելու անվերապահ համաձայնություն։ «Վարդանանց» բժշկական կենտրոնում քաղաքացուն այսպիսի բովանդակությամբ համաձայնություն են առաջարկել ստորագրել՝ քովիդի թեստ հանձնելու համար։ Անձնական տվյալների անձեռնմխելիության խախտման խնդրի մասին քաղաքացին գրառում է արել ֆեյսբուքյան էջում։
Համաձայնություն ստանալն իրավաչափ է, բայց պետք էր քաղաքացուն պատշաճ իրազեկել, թե ինչի համար է ստորագրում, Factor TV-ի հարցին ի պատասխան՝ արձանագրեց առողջապահության նախարար Անահիտ Ավանեսյանը։
Նախարարության կողմից բուժհաստատություններին նման գործելաոճի առաջարկ չի եղել՝ նշում է նախարարը։ Սա մասնավոր ընկերության որոշումն է։
Factor TV-ն փորձեց պարզաբանում ստանալ նաև «Վարդանանց» բժշկական կենտրոնից։ ԲԿ-ի զարգացման և ռազմավարական ծրագրերի գծով տնօրեն Նելսոն Զուլոյանը մեզ հետ զրույցում նշեց, որ թերի անձնական տվյալներով այցելուներին հրաժարվում են սպասարկել առհասարակ։ Կենտրոնից տեղեկացրին, որ բնակչության պետական ռեգիստրի հետ «Վարդանանց» բժշկական կենտրոնը համաձայնագիր ունի, որը սկսել է գործել երեկվանից և կապված է կենտրոնի միասնական էլեկտրոնային կառավարման համակարգում այցելուների տվյալների թարմացման հետ։ Հարցին՝ ինչո՞ւ 10 տարով, տնօրենը պատասխանեց․ ենթադրում են, որ եթե այցելուն դառնում է «Վարդանանց»-ի հաճախորդ, պարբերաբար ծառայություն է ստանալու։ Ըստ կենտրոնի ներկայացուցչի՝ ցանկացած պահի այցելուն կարող է գրավոր դիմել և պահանջել իր տվյալները փոփոխել կամ ոչնչացնել։
Եթե անձնական տվյալներին հասանելիությունն իրավաչափ է, ապա այդ տվյալները տրամադրել հրաժարվող քաղաքացուն չսպասարկելը հակասում է սահմանադրական նորմերին՝ պարզաբանում են Առողջապահության նախարարությունից։
ՀՀ բնակչության բժշկական օգնության և սպասարկման մասին օրենքի 13-րդ հոդվածը ամրագրում է․ «Յուրաքանչյուր ոք՝ անկախ ազգությունից, ռասայից, սեռից, լեզվից, դավանանքից, տարիքից, առողջական վիճակից, հաշմանդամությունից, քաղաքական կամ այլ հայացքներից, սոցիալական ծագումից, գույքային կամ այլ դրությունից, Սահմանադրությամբ, սույն օրենքով և այլ օրենքներով, ինչպես նաև Հայաստանի Հանրապետության միջազգային պայմանագրերով սահմանված կարգով ունի բժշկական օգնություն և սպասարկում ստանալու իրավունք»։
Անահիտ Ավանեսյանը հայտնեց, որ նախարարության համապատասխան վարչությունը զբաղվում է խնդրով և առաջիկայում այդ մասին տեղեկություն կտրամադրի։
Մանրամասները՝ տեսանյութում։
Սաթենիկ Հայրապետյան
