24.03.2026 | 20:37
Արարատի մարզում գազալցակայանի գործունեություն է կասեցվել
Ինչո՞ւ է երեխան 2 տարի լռել, մայրը՝ հանդուրժել․ նոր մանրամասներ մանկապարտեզի աղմկահարույց դեպքից. ՏԵՍԱՆՅՈՒԹ
Հասարակություն
16.02.2022 | 20:50
Նախորդ ամսվա վերջերին կինը ոստիկանություն հաղորդում էր ներկայացրել այն մասին, որ իր երեխային մանկապարտեզում 2 տարի շարունակ բռնության են ենթարկել։ Մոր խոսքով՝ ամեն ինչ սկսվել է 2019 թվականին։
Մանկապարտեզում փոքր քրոջը հասցված վիրավորանքների մասին մորը մեծ դուստրն է պատմել, որը մանկապարտեզի հարևան խմբում էր։ Երբ աղջիկն արդեն սկսել է դպրոց հաճախել, ըստ մոր՝ ինքն արդեն տեղեկություն չի ունեցել, թե մանկապարտեզում ինչ է կատարվում փոքր դստեր հետ։
Ասում է՝ երեխային 2 տարի շարունակ կտտանքների են ենթարկել, ծաղրել ու սպառնացել։ Մոր՝ երեխային մանկապարտեզից հանելու ցանկությունը կանխել է փոխտնօրենը, սակայն հոկտեմբերի 14-ին, երբ երեխան տանը լացել է և ասել, որ գլուխը ցավում է, մայրը նրան տարել է բուժզննման։ Պարզվել է՝ երեխան գլխին իսկապես հարված է ստացել։
Մայրը պնդում է, որ մանկապարտեզում երեխային հոգեբանորեն ճնշել են, վախեցրել, որ տանն անգամ ծովախոզուկին չպատմի մանկապարտեզում տեղի ունեցածը, և երեխան սկսել է խոսել միայն խոստումից հետո, որ այլևս այդ մանկապարտեզ չի գնալու։
Երեխան տեղի ունեցածի մասին պատմել է Երևանի քաղաքապետարանում, ուր մայրն ի սկզբանե դիմել էր։ Հենց քաղաքապետարանից են բողոքը փոխանցել Ոստիկանություն, որի հիման վրա քրեական գործ է հարուցվել՝ ՀՀ քրեական օրենսգրքի 119-րդ հոդվածի 2-րդ մասի 6-րդ և 7-րդ կետերով՝ ֆիզիկական ուժեղ ցավ կամ հոգեկան ուժեղ տառապանք պատճառելը, որոնք կատարվել են առանձին դաժանությամբ, ազգային, ռասայական կամ կրոնական ատելության կամ կրոնական մոլեռանդության շարժառիթով։
Դայակի, դաստիարակի և տնօրենի հետ այսօր կապվել չհաջողվեց։ Մինչ այդ մանկապարտեզի ծնողներն իրենց կամքով էին գնացել ցուցմունք տալու: Factor TV-ն նրանց հետ զրուցել էր դեռ փետրվարի 4-ին։
Որ 3-րդ երկիր մեկնելու և ապաստան ստանալու միտք ունի, մայրը բացառում է, ասում է՝ երբևէ որևէ երկիր մեկնելու համար դեսպանատուն չի դիմել, մերժում էլ չունի։
Հիմա ամուսնալուծված են, երեխաներն էլ երկքաղաքացիություն ունեն։
Մայրը պնդում է, որ դատաբժշկական փորձագետը նաև երեխայի կրծքավանդակին այրվածքի սպի է արձանագրել։ Երեխայի հետ հոգեբան է աշխատել, տեղափոխվել է այլ մանկապարտեզ, մայրն էլ, որ նույն մանկապարտեզում որոշ ժամանակ առաջ անգլերեն է դասավանդել մեծերի խմբում, հույս է հայտնում, որ տարվող քննությունը շատ հարցերի պատասխանը կտա։ Այս պահին քննություն է ընթանում, նշանակվել են փորձաքննություններ։ Քննչական կոմիտեից առայժմ գործի վերաբերյալ մանրամասներ չեն հաղորդում, իսկ գործով ներգրավված փաստաբան Ինեսսա Պետրոսյանը խոստացավ այս մասին խոսել առաջիկա օրերին։
Մանրամասները՝ տեսանյութում։
Սաթենիկ Հայրապետյան
