19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Քաղաքացիները երթևեկության կանոնների 540 խախտում են նկարել և ուղարկել Ոստիկանություն. ՏԵՍԱՆՅՈՒԹ
Հասարակություն
16.02.2022 | 18:02
Նախորդ տարվա հուլիսի 1-ին ուժի մեջ էր մտել Կառավարության որոշումը, ըստ որի՝ այսուհետ ցանկացած անձ, որն ունի սմարթֆոն, կարող է հավելվածի միջոցով տեսանկարահանել կամ լուսանկարել երթևեկության կանոնների խախտումները և դրանք ուղարկել քննության։
Բջջային հավելվածը հնարավորություն է տվել արձանագրել առավել հաճախակի հանդիպող և սովորական քաղաքացու համար տեսանելի 12 իրավախախտում, այդ թվում՝ հանդիպակաց երթևեկության գոտի դուրս գալը, կանգառի կանոնները խախտելը, լուսացույցի ազդանշանին չենթարկվելը, տրասնպորտային միջոցից աղբ նետելը։ Եթե խաչմերուկներում տեղադրված են տեսախցիկներ, ապա հարակից տարածքում համակարգը թույլ չի տա արձանագրել խախտումը, իսկ տեսանկարահանելիս հավելվածն ավտոմատ է արձանագրում ժամանակն ու տեղանքը։
Նշենք, որ ըստ ծրագրի՝ եթե արձանագրել եք խախտում և տեսանյութը ներմուծել հավելված, սակայն կադրերում չի երևում կամ ընթեռնելի չէ ավտոմեքենայի համարանիշը, ապա վարչական տույժ նշանակելու մասին որոշում չի կայացվի։ Եթե մեկ ամսվա ընթացքում նույն տրանսպորտային միջոցի վերաբերյալ ներկայացված տվյալներով երկու անգամ վարչական տույժ նշանակելու մասին որոշման կայացումը մերժվի, ապա երկու ամսով հնարավորություն չեք ունենա օգտվել հավելվածից։ Իսկ եթե մեկ ամսվա ընթացքում հինգ և ավելի անգամ է ձեր ներկայացրած տվյալների արդյունքում վարչական տույժ նշանակելու մասին որոշման կայացումը մերժվում կամ հնարավոր չի լինում նույնականացնել խախտումը կատարած անձի տրանսպորտային միջոցի հաշվառման համարանիշը, ապա այս դեպքում ևս երկու ամսով չեք կարողանա օգտվել համակարգից։
Անցած յոթ ամիսների ընթացքում Ճանապարհային ոստիկանությունը քաղաքացիների կողմից ստացել է ենթադրյալ խախտումների վերաբերյալ 540 նյութ, որոնց հիման վրա կայացվել է վարչական տույժ նշանակելու մասին 174 որոշում։ Այս մասին Factor TV-ի գրավոր հարցմանն ի պատասխան՝ հայտնել են Ոստիկանությունից։ Գերատեսչությունից խնդրել էինք նաև պարզաբանել, թե ինչպես են գնահատում ծրագրի արդյունավետությունը, սակայն Ոստիկանությունն այս հարցը շրջանցել է։
Մանրամասները՝ տեսանյութում։
Ռոզա Վարդանյան
