Երևանում ՄԱԿ-ի գրասենյակի մոտ բողոքի ակցիա է ընթանում՝ Արցախում հայկական ժառանգության պահպանման պահանջով:
Ակցիայի մասնակիցների ձեռքին հայկական մշակութային ժառանգության կոթողների լուսանկարներ և պաստառներ են, որոնց վրա անգլերենով գրված էր. «Թույլ մի՛ տվեք ազերիներին ոչնչացնել ու խեղաթյուրել պատմությունը», «Դուք պատասխանատու եք Արցախի ու Նախիջևանի մշակութային ցեղասպանության համար»:
«Իրավական մեխանիզմները, գործիքակազմը բավականին շատ են, այդ թվում և Հաագայի դատարանը, ՄԱԿ Անվտանգության խորհուրդը, ԵԽ-ն ևս ունի լուրջ մեխանիզմեր, բայց կարևոր են նաև քաղաքական հայտարարությունները, որոնք որոշակի զսպիչ մեխանիզմ են Արցախի դեմ»,- այս մասին լրագրողների հետ զրույցում ասաց ակցիայի կազմակերպիչներից «Հանուն հավասար իրավունքների կրթական կենտրոնի» ներկայացուցիչ, ԱԺ նախկին պատգամավոր Գայանե Աբրահամյանը։
Նրա խոսքով՝ աշխատանք պետք է իրականացնել բոլոր ուղղություններով՝ և՛ քաղաքական, և՛ հասարակական, և՛ պաշտոնական խողովակներով. «Այստեղ պարտավորությունը միայն պետությանը չէ, մենք որպես հասարակություն էլ կարող ենք ավելին իրականացնել»:
Գայանե Աբրահամյանը կարևորեց ռուս խաղաղապահների դերը Արցախում. «Ռուս խաղաղապահներն Արցախում ահռելի գործառույթներ ու լծակներ պետք է ունենան ոչ միայն քաղաքացիների, այլ նաև մշակութային հուշարձանների պաշտպանության հարցում. դրանք ինքնության կարևորագույն մասունքներ են:
Ցավալի է, որ ՌԴ ՊՆ կայքում խեղաթյուրում եղավ, տեքստ դրեցին, որ ռուս խաղաղապահները Դադիվանք են գնացել, ինչ-որ գործողություններ են արել, և մեկ ժամ անց այդ տեքստից հանվեց այն պարբերությունը, որտեղ նշված էր, որ Դադիվանքը հայկական մեծ վանական համալիրներից մեկն է: Մենք տեսնում ենք, որ այդ կողմից էլ դիրքերի որոշակի հետքաշում կա, ինչը խիստ մտահոգիչ է»:
Մանրամասները՝ տեսանյութում:
