16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Ռոբերտ Քոչարյանի պաշտպանների նկատմամբ կիրառվել է սանկցիա՝ 50 հազար դրամ տուգանքի տեսքով
Հասարակություն
16.02.2022 | 00:21
Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, դատական սանկցիա է կիրառել ՀՀ երկրորդ նախագահ Ռոբերտ Քոչարյանի պաշտպաններ Հայկ Ալումյանի և Հովհաննես Խուդոյանի նկատմամբ։ Նրանցից յուրաքանչյուրը պարտավորվել է վճարել տուգանք՝ 50.000 դրամի չափով: Այս մասին Factor.am-ը տեղեկացավ Ռոբերտ Քոչարյանի պաշտպանական թիմից:
Ինչպես տեղեկացրել էինք, մեղադրող դատախազի կողմից մեղադրական եզրակացությունը հրապարակվելուց հետո, Քոչարյանի պաշտպանները հայտարարել են, որ մեղադրանքը պարզ չէ և պահանջել պարզաբանել դրա էությունը, սակայն պարզաբանումներ չստանալով՝ լքել դատական նիստերի դահլիճը՝ ի նշան բողոքի։ Դատախազ Գևորգ Բաղդասարյանը միջնորդել էր պաշտպանների նկատմամբ դատական սանկցիա կիրառել։ Դատարանը հեռացել էր խորհրդակցական սենյակ։
Ռոբերտ Քոչարյանի և Արմեն Գևորգյանի գործով՝ շուրջ մեկ տարվա քննությունից հետո, դատարանն այսօր դատաքննության փուլ մտավ։ Դատախազ Պետրոս Պետրոսյանը հրապարակեց մեղադրական եզրակացության եզրափակիչ մասը։ Ըստ որի՝ 2008 թվականին գործարար Սիլվա Համբարձումյանը հանք շահագործելու նպատակով՝ ուսումնասիրման հատուկ լիցենզիաներ ստանալու և իրեն պատկանող ընկերության վաճառքին չխոչընդոտելու համար, նախկին արտգործանախարար Վարդան Օսկանյանի միջնորդությամբ դիմել և կաշառք է առաջարկել երկրորդ նախագահ Ռոբերտ Քոչարյանին և այլ պաշտոնատար անձանց։ Վերջիններս կաշառքի առաջարկն ընդունել են, որը ստանալու նպատակով պաշտոնյաների անունից դրանք ստանալու համար ներկայացել է Քոչարյանի մտերիմ, գործարար Սամվել Մայրապետյանը։ 2008թ.փետրվարին և մայիսին Սամվել Մայրապետյանի օժանդակությամբ,ըստ մեղադրանքի,պաշտոնաթող նախագահը ստացել է առանձնապես խոշոր չափերով՝ 927 մլն ՀՀ դրամին համարժեք 3 մլն ԱՄՆ դոլարի չափով կաշառք։
Իսկ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար, 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։
Ռոզա Վարդանյան
