15.09.2026 | 21:11
Ալիևը Եվրախորհրդարանը «կոռուպցիոներների որջ» է անվանել ու եվրոպական կառույցներին մեղադրել ՀՀ-ին աջակցելու մեջ
«3+3» ձևաչափով երկրորդ հանդիպումը կանցկացվի Իրանում․ ժամկետ չի նշվում
Քաղաքականություն
15.02.2022 | 13:25
ՌԴ-ի ու Իրանի ԱԳ նախարարներ Սերգեյ Լավրովն ու Հոսեյն Ամիր Աբդոլլահիանը նախօրեին հեռախոսազրույց են ունեցել։ Այլ հարցերից զատ՝ կողմերը քննարկել են նաև տարածաշրջանային «3+3» ձևաչափը, գրում է իրանական «Մեհր» գործակալությունը։
Իրանական կողմի հաղորդմամբ՝ Լավրովը ողջունել է Իրանում տարածաշրջանային «3+3» ձևաչափով երկրորդ հանդիպման անցկացումը և հույս հայտնել, որ այն հետագայում կապահովի տարածաշրջանի երկրների շահերը և կպահպանի տարածաշրջանային կայունությունն ու անվտանգությունը։
Իրանի ԱԳ նախարարն իր հերթին «3+3» ձևաչափի առաջիկա հանդիպումը համարել է «մեծ հնարավորություն փոխգործակցության հաստատման և տարածաշրջանային համագործակցության խորացման համար՝ տարածաշրջանի երկրների և ժողովուրդների շահերին համապատասխան»։
Ուշագրավ է, որ երկու երկրների նախարարների զրույցի մասին ՌԴ ԱԳՆ-ի տարածած հաղորդագրության մեջ «3+3» ձևաչափով հադիպման մասին ոչինչ չի ասվում։
Հիշեցնենք, որ դեկտեմբերի 10-ին Մոսկվայում կայացել էր Հարավային Կովկասում համագործակցության «3+3» ձևաչափով առաջին հանդիպումը, որին մասնակցել էին Հայաստանի, Ռուսաստանի, Թուրքիայի, Ադրբեջանի և Իրանի ներկայացուցիչները։ Վրաստանը հրաժարվել է այս ձևաչափով հանդիպումներին մասնակցությունից։
Էմմա Չոբանյան
