15.09.2026 | 21:11
Ալիևը Եվրախորհրդարանը «կոռուպցիոներների որջ» է անվանել ու եվրոպական կառույցներին մեղադրել ՀՀ-ին աջակցելու մեջ
Pfizer պատվաստանյութը Հայաստանում է, բայց պատվաստման ցուցանիշով մնում ենք հետնապահ. ՏԵՍԱՆՅՈՒԹ
14.02.2022 | 15:30
Pfizer պատվաստանյութի շուրջ 100 հազար դեղաչափ արդեն Հայաստանում է։ Այն ներկրվել է ՀՀ Առողջապահության նախարարության և ամերիկյան Pfizer դեղագործական ընկերության միջև կնքված պայմանագրով։ Գործադիրն այդ նպատակով 2021 թվականի դեկտեմբերի վերջին պետբյուջեից 1.2 մլրդ դրամ էր հատկացրել Առողջապահության նախարարությանը։ Անահիտ Ավանեսյանն էլ անցյալ տարվա դեկտեմբերի 23-ին Կառավարության նիստում հայտնել էր, որ նախատեսվում է ձեռք բերել Pfizer պատվաստանյութի 200․000 դեղաչափ։
«Կստանանք նաև նվեր խմբաքանակներ»,- ասել էր նա։
Այս պատվաստանյութը, սակայն, պետք է Հայաստան ներկրվեր ավելի վաղ՝ դեռևս 2021 թվականի սեպտեմբեր-հոկտեմբերին։ Նախարարությունից սեպտեմբերին մեզ հայտնել էին, որ խմբաքանակի ներկրման ուշացումը կապված է արտադրական ցիկլի, մատակարարման ժամկետների հետ։
Նախարարությունը տեղեկացնում է, որ Pfizer-ը, ինչպես երկրում առկա մյուս պատվաստանյութերը, հասանելի կլինեն առողջության առաջնային պահպանման օղակներում և պատվաստումային շարժական կետերում:
Նշենք, որ Հայաստանում մինչ այս հասանելի էին կորոնավիրուսային վարակի դեմ «ԱստրաԶենեկա», «Սպուտնիկ», «Սպուտնիկ լայթ», «Սինոֆարմ», «Մոդեռնա» պատվաստանյութերը։
Հավելենք նաև, որ վերջին տասնօրյակում Հայաստանում կորոնավիրուսի դեպքերի աճ կա, ավելացել են նաև մահացության թվերը։ Այսօր գրանցվել է կորոնավիրուսի 695 նոր դեպք, 19 մարդ մահացել է։ Վերջին շրջանում մահվան ամենաբարձր ցուցանիշը գրանցվեց փետրվարի 11-ին․ մեկ օրում՝ 31 մահ։
Հիվանդացության աճը պատասխանատուներին ստիպել է այսօր վերաբացել «Գյումրի» բժշկական կենտրոնի կորոնավիրուսային բաժանմունքը։ Այս պահին բուժհաստատությունում ստացիոնար բուժում է ստանում 19 հիվանդ։
Մանրամասները՝ տեսանյութում։
Արփի Հակոբյան
