18.08.2026 | 15:45
Վանաձոր քրեակատարողական հիմնարկի կալանավորը, ըստ հարազատների, մեկ ամիս է՝ հացադուլի մեջ է
44-օրյա պատերազմի ուսումնասիրություն՝ առանց ընդդիմության․ քննիչ հանձնաժողովը երկուշաբթի կսկսի աշխատել․ ՏԵՍԱՆՅՈՒԹ
Քաղաքականություն
11.02.2022 | 19:32
ԱԺ իշխող խմբակցության նախաձեռնությամբ ստեղծվեց 44-օրյա պատերազմի հանգամանքներն ուսումնասիրող քննիչ հանձնաժողովը։ Համապատասխան հայտարարությունը երեկ ստորագրել է ԱԺ նախագահի լիազորությունները կատարող Հակոբ Արշակյանը։ Հանձնաժողովն ուսումնասիրելու է, թե ինչ է տեղի ունեցել 2020 թվականի սեպտեմբերի 27-ին սկսված պատերազմում, արդյո՞ք եղել են թերացումներ և ովքեր են դրանց պատասխանատուն։ Իշխանական պատգամավոր Արմեն Խաչատրյանն ասում է՝ հարցերը բազմաթիվ են, որ պետք է պարզվեն հանձնաժողովի շրջանակներում։ Խաչատրյանը վստահեցնում է՝ ոչ միայն ռազմական, այլև քաղաքական որոշումները քննության առարկա կդառնան։
ԱԺ ընդդիմադիր 2 խմբակցությունները որոշում են կայացրել չմասնակցել քննիչ հանձնաժողովի աշխատանքին։ Հայտարարության մեջ մասնավորապես նշվում է. «Իշխանությունը, որը հրապարակավ հայտարարել է, որ աղետալի պատերազմի հետևանքների «թիվ մեկ մեղավորը» և «թիվ մեկ պատասխանատուն» հենց ինքն է, իր գլխավորությամբ ստեղծում է քննիչ հանձնաժողով։ ԱԺ Պաշտպանության եւ անվտանգության հարցերի մշտական հանձնաժողովը` իր նախագահությամբ, որի կազմում գործելու է քննիչ հանձնաժողովը, առհասարակ զուրկ է որևէ կերպ օբյեկտիվ լինելու հնարավորությունից, այդ թվում՝ առկա են մասնակցության անհնարինության հիմքեր հանձնաժողովի նախագահի պարագայում։ Հստակ է, որ քննիչ հանձնաժողովն իշխանությունների «անմեղության» բեմադրությանն է լծված լինելու։ Այս և մի շարք այլ հանգամանքներ հաշվի առնելով` ընդդիմադիր «Հայաստան» և «Պատիվ ունեմ» խմբակցությունները որոշում են կայացրել չմասնակցել իշխանությունների ստեղծած քննիչ հանձնաժողովի աշխատանքներին»:
Ընդդիմադիր դաշինքներից միաժամանակ հայտնում են, որ 44-օրյա աղետալի պատերազմի հետևանքների մեղավորների բացահայտումը մնում է իրենց գլխավոր առաջնահերթություններից մեկը: Այսպիսով ստացվում է, որ իշխանական խմբակցությունը միանձնյա հարցեր է ուղղելու ռազմաքաղաքական ամենատարբեր պաշտոնյաների և վերջում բացառապես իր հայեցողությամբ կազմելու եզրակացությունը։ Երկուշաբթի տեղի կունենա քննիչ հանձնաժողովի առաջին նիստը, որի ժամանակ պետք է հաստատվի աշխատակարգը։
Մանրամասները՝տեսանյութում։
Մերի Մարտիրոսյան
